Áleýmettik jeli Nurlan Noǵaevty qoqys jáshikterin tekserýge «májbúrledi»
ATYRAÝ. QazAqparat - Atyraýda qala men qala mańyndaǵy qoqysty ýaqtyly jınamaýǵa qatysty áleýmettik jelide talqylanǵan synı pikirler oblys ákimi Nurlan Noǵaıbaevty beı-jaı qaldyrmady.
Óńir basshysy birneshe shaǵynaýdandar men kentterde bolyp, «Arnaıyavtobaza» JShS qalaı jumys isteıtinin jeke aralap shyǵýdy jón sanady. Kásiporyn qyzmetin tekserýge oblys ákimimen birge qala ákimi Serik Shapkenov pen onyń orynbasarlary, tikeleı qoqysty ýaqtyly jınaýǵa jaýapty birqatar tulǵalar birge shyqty.
«Bastapqyda ákimdik kásiporynǵa jumysqa qajetti tehnıka berdi. Kásiporyn jylyna 500 mln teńgeden astam paıda tabady. Óz betinshe tehnıka satyp alýǵa ne kedergi bar? Tutas park emes, úsh-tórt qoqys tasıtyn kólik alýǵa bolady ǵoı. Jyl saıyn aýystyratyn múmkindikterińiz bar. Álde bulaı jumys isteýge bolmaıdy degenimizdi kútip otyrsyzdar ma?», - dedi oblys ákimi JShS dırektory M. Shapkenovke.
Ákim qoqys jınaıtyn barlyq kólikke GPS-shamyn ornatýdy, barlyq konteınerlerdi qalanyń onlaın-kartasyna engizýdi tapsyrdy. Odan kez kelgen qalalyq búgin onyń kóshesinde qoqys tazartyldy ma, joq pa, sony kóre alatyn bolady.
«Basshylyq júretin kósheni ǵana tazalap qajeti joq. Sátbaev dańǵyly men áýejaıǵa barar jol únemi tap-taza. Erkinqala, Jumysker, Geolog, Atyraý shaǵyn aýdany qoqysqa kómilip jatyr. Áleýmettik jeli, messendjerler arqyly tirkeleı halyqpen jumys isteńizder», - dep tapsyrdy baǵynysty qyzmetkerlerge oblys ákimi.
