Áleýmettik jáne kóliktik ınfraqurylymdardyń 80 paıyzǵa jýyǵy múgedekterge laıyqtalmaǵan - QR DÁDM

ASTANA. QazAqparat - Áleýmettik jáne kóliktik ınfraqurylymdardyń 79 paıyzy múgedekterge laıyqtalmaǵan. Bul týraly QR Densaýlyq saqtaý jáne áleýmettik damý mınıstrligi áleýmettik qyzmetter departamentiniń dırektory Ajar Túleǵalıeva málim etti.

"Áleýmettik, rekreatsııalyq jáne kóliktik ınfraqurylymdardyń 79 paıyzdan astamy múgedekterdiń júrip-turýyna laıyqtalmaǵan. Mektepke deıingi oqý oryndarynyń 96 paıyzynda, mektepterdiń 83 paıyzynda ınklıýzıvti oqytý múmkindigi jasalmaǵan. Mamandardyń málimetterinshe, múgedekterdiń 25 paıyzy óz jaǵdaılaryna nashar dep baǵa bergen. Sonymen qatar olar memlekettik organdardyń, bıznestiń jáne qoǵamdyq uıymdardyń yńǵaıly orta qurýdaǵy jumystarynda úılesim joq ekendigin aıtyp otyr", - dedi ol búgin "Nur Otan" partııasynda ótken dóńgelek ústelde.

Departament basshysynyń aıtýynsha, "Múgedekterdiń quqyqtaryn qorǵaý jónindegi keıbir zańdarǵa ózgerister men tolyqtyrýlar engizý týraly" zań jobasy jasaqtalǵan.

"Zań jobasy Úkimette qaralýda jáne jyldyń sońyna deıin Parlamentke enedi dep josparlanýda", - dedi ol.

Qazaqstanda múmkindigi shekteýli 626 myń azamat tirkelgen. Onyń 76 myńǵa jýyǵy - zaǵıp jandar. Dóńgelek ústeldi "Nur Otan" partııasy men QR Parlamenti májilisiniń qoldaýymen "Arjan" qoǵamdyq qory uıymdastyrdy.