Áleýmettik jaǵdaıy tómen ortadan shyqqan balalarǵa Astana ákimdigi arnaıy granttar taǵaıyndaıdy
ASTANA. 5 tamyz. QazAqparat - 3 tamyz kúni «Meıirim-Demeý» qoǵamdyq birlestiginiń uıymdastyrýmen «Oralmandardy áleýmettik beıimdeý jáne qoldaý qyzmetin uıymdastyrý» atty áleýmettik joba aıasynda Astana qalasyndaǵy oralmandardyń qatysýymen trenıng ótkizildi. Trenıngti Astana qalasy Jumyspen qamtý jáne áleýmettik baǵdarlamalar basqarmasynyń Almaty aýdany boıynshy bólim basshysy Aıat Orynbekova júrgizdi. Bul týraly «Meıirim-Demeý» qoǵamdyq birlestigi habarlap otyr.
Birlestiktiń habarlaýynsha, A. Orynbekova jınalǵan qandastarymyzǵa Astana qalasynda halyqty áleýmettik qorǵaý júıesinde atqarylyp jatqan júıeli jumystar týraly jan-jaqty jáne paıdaly aqparattarmen tanystyryp, eńbek naryǵy, halyqty jumyspen qamtý máselesi, sondaı-aq turmys jaǵdaıy tómen adamdarǵa, múgedekterge, jumyssyzdar, zeınetkerler men ózin-ózi qamtamasyz ete almaıtyn adamdardyń balalaryna áleýmettik kómek pen qoldaý kórsetý, ómirdiń qıyn jaǵdaıyna, ıaǵnı adamnyń tirshilik áreketin buzatyn jaǵdaılarǵa (múgedektik, egde jasqa kelýine baılanysty ózine ózi qyzmet kórsetý qabiletsizdigi, aýrýǵa ushyraýy, jetimdik, turmysy nashar, belgili turatyn jeriniń bolmaýy jáne t.b.) tap bolǵan azamattarǵa qajetti qoldaý kórsetý sharalary týraly habardar etti.
Qazaqstan Respýblıkasynyń 2001 jylǵy 17 shildedegi № 246-II «Memlekettik ataýly áleýmettik kómek» týraly Zańyna sáıkes otbasynyń jan basyna shaqqandaǵy ortasha aılyq tabysy belgilengen kedeılik sheginen tómen otbasylarǵa ataýly áleýmettik kómek, Qazaqstan Respýblıkasynyń 2005 jylǵy 28 maýsymdaǵy № 63-III «Balaly otbasylarǵa beriletin memlekettik járdemaqylar týraly» Zańyna sáıkes 18 jasqa deıingi balalary bar otbasylarǵaberiletin memlekettik járdemaqylar jáne taǵy basqa da turǵyn úı kómeginiń kólemi jáne kórsetiletin tártibin túsindirip berdi.
Sondaı-aq, Astana qalasy ákimdigi jyl saıyn 2004 jyldan bastap jalpy bilim beretin mektepterdiń túlekterine joǵarǵy oqý orynyna túsýine oqý granty túrinde arnaıy kómek beretinitýraly habardar etti.
«Osy Astana qalasy ákimniń jalpy bilim berý grantyn alý quqyna Astana qala mektepterin aǵymdaǵy jyly bitirýshi jetim balalar, balalar úıiniń tárbıelenýshileri, bala kezden múgedekter men ata-analarynyń qamqorlyǵynsyz qalǵan balalar jáne kópbalaly otbasynyń balalary ıe bola alady jáne eńbek naryǵynda asa talap etilgen mamandyqtar boıynsha oqytylady», - dep atap ótti A. Orynbekova.
Aıta ketý kerek, memlekettik áleýmettik tapsyrys aıasynda Astana qalasy Іshki saıasat basqarmasynyń qoldaýymen «Meıirim-Demeý» qoǵamdyq birlestigi «Oralmandardy áleýmettik beıimdeý jáne qoldaý qyzmetin uıymdastyrý» atty áleýmettik joba jumysyn júrgizýde.
Joba aıasynda oralmandardyń jańa ortaǵa kirigip, qoǵamdyq ómirge erkin aralasýyna múmkindik jasaý, qoǵamdyq belsendiligin arttyrý maqsatynda birqatar trenıng, oqytý sabaqtary ótkizilmek.
