Áleýmettik jaǵdaıy tómen 24 elordalyq otbasy qurylys kompanııalary atynan baspanaly boldy
ASTANA. 6 jeltoqsan. QazAqparat /Gúlmıra Álıakparova/ - Búgin Astana qalasy ákimdiginde elorda basshysy Imanǵalı Tasmaǵambetovtyń qatysýymen qaladaǵy áleýmettik álsiz sanattaǵy 24 otbasyna páter kiltteri tabys etildi.
Іs-sharanyń ereksheligi - baspanalar memlekettik turǵyn úı qorynan emes, qaıyrymdylyq negizde qaladaǵy 17 qurylys kompanııasynan bólindi.
Astana ákimdiginiń usynysy boıynsha kásipkerler turǵyn úılerge úmitkerlerdi irikteý barysynda turmystyq jaǵdaıy tómen jáne turǵyn úı kezegi boıynsha aldaǵy ýaqytta páterge ıe bolý múmkindikteri joq otbasylardy birinshi kezekte qaperge aldy. Nátıjesinde 24 páterge baspanalary apattyq jaǵdaıdaǵy, januıalarynda múgedek jáne syrqattary aýyr balalary bar azamattar ıe boldy.
«Jalpy muqtaj janǵa qolushyn berý qashanda zor jaýapkershilik, úlken azamattyq paryz dep esepteımin. Bul oraıda belgili qurylys kompanııalary keńese kele, qalamyzdaǵy kómekke zárý jandardyń baspana máselesin sheship berý isin qolǵa aldy. Árıne, barlyq túıtkildi bir kúnde sheship tastaý múmkin emes. Biraq, jumyla kótergen júk jeńil. Sondyqtan, qoǵamdaǵy áleýmettik máselelerge birigip kirisýimiz qajet»,- dedi I. Tasmaǵambetov.
Aıta keteıik, qazirgi tańda memlekettik turǵyn úı qorynan baspana alý úshin kezekte 18 805 azamat tur. Sonyń 9207-si áleýmettik jaǵynan az qamtylǵandar.
