Áleýmettik tólemder alýǵa arnalǵan qujatty «elektrondyq úkimet» arqyly rásimdeýge bolady
ASTANA. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine áleýmettik-eńbek salasyndaǵy kórsetiletin memlekettik qyzmetterdi ońtaılandyrý jáne avtomattandyrý máseleleri boıynsha ózgerister men tolyqtyrýlar engizý týraly» QR Zańyn qabyldady.
Qujat áleýmettik-eńbek salasyndaǵy 36 memlekettik qyzmettiń 16-syn ózgertýdi qamtıdy.
«Engizilip otyrǵan jańa normalar bul qyzmetterdi azamattardyń tek memlekettik jáne jergilikti organdarda nemese zeınetaqy ortalyqtarynda ǵana emes, Halyqqa qyzmet kórsetý ortalyqtarynda, sondaı-aq «elektrondyq úkimet» portaly arqyly alý múmkindigin qarastyrady. Bul rette qyzmet kórsetý mekemelerin tańdaý quqyǵy árkimniń óziniń jeke sheshimine baılanysty bolmaq. Al qyzmet alý oryndaryn keńeıtý bir jaǵynan memlekettik qyzmetke qoljetimdilikti arttyrsa, ekinshi jaǵynan mekemeler arasyndaǵy básekelestik kórsetiletin qyzmettiń sapasyn jaqsartýǵa ıgi áser etedi», - dedi Densaýlyq saqtaý jáne áleýmettik damý mınıstri Tamara Dúısenova.
Onyń aıtýynsha, Halyqqa qyzmet kórsetý ortalyqtary arqyly memlekettik qyzmettiń on túrin qamtý múmkindigi qarastyrylady. Sonyń ishinde respýblıkalyq bıýdjetten jáne memlekettik áleýmettik saqtandyrý qorynan beriletin múgedektigi boıynsha, asyraýshysynan aıyrylý, jasyna baılanysty zeınetke shyǵý, jumysynan aıyrylýyna baılanysty tólenetin bazalyq járdemaqylar men áleýmettik tólemder qarastyrylǵan. Bul tólemder qazirgi tańda 700 myńǵa jýyq azamattarǵa beriledi.
Budan bólek, mınıstrdiń sózine qaraǵanda, áleýmettik tólemder úshin HQKO-yna ótkizetin qujattar tizimi de qysqartylǵan. Máselen, zeınetaqyǵa ótinish berý úshin buryn talap etiletin úsh qujattyń bireýin ǵana - jeke kýálikti kórsetse bolǵany. Al qyzmet kórsetý ýaqyty 7 kúnnen 1 kúnge deıin qysqarady.
Sonymen qatar jasyna baılanysty beriletin áleýmettik járdemaqy, jumystan shyǵyp qalýyna nemese bala baǵýǵa baılanysty áleýmettik tólemder alýǵa arnalǵan qujattardy da elektrondy úkimet arqyly rásimdeıtin bolady.
Parlament qabyldaǵan zań Memleket basshysynyń qol qoıýyna joldanady.
