Áleýmettik-saıası zertteýler ınstıtýty Májilis saılaýyn áleýmettik súıemeldeý naýqanyn bastaıdy
ASTANA. 7 jeltoqsan. QazAqparat /Marlan Jıembaı/ - Áleýmettik-saıası zertteýler ınstıtýty QR Parlamenti Májilisiniń saılaý naýqanyn áleýmettik súıemeldeý jumystaryn bastaıdy.
Bul týraly búgin elordada atalǵan ınstıtýttyń dırektory, saıası ǵylymdar doktory Aıgúl Sádýaqasova málim etti.
«Saılaý naýqany kezeńinde áleýmettik zertteýler áleýmettik zor mańyzǵa ıe. Bul zertteýlerdiń fýnktsııalary keń jurtshylyqty halyqtyń saılaý belsendiligi, saılaýaldy dodaǵa qatysýshylardyń reıtıngi týraly obektıvti aqparatpen qamtamasyz etýdi jáne daýys berý nátıjelerin boljamdaýdy qamtıdy», - dedi ol.
Onyń atap ótýinshe, ınstıtýt elektoraldy áleýmettik zertteýler ádistemesine saı kóńil-kúıdiń jaǵdaıyn saılaýdyń basynda jáne onyń aıaqtalýy kezinde júrgizbek. Árbir tolqynda eki myń adam suralady. Іriktemege Qazaqstannyń barlyq oblystary, Almaty men Astana qalalary kiredi. Іrikteme saılaý jasyndaǵy respýblıka halqyn jynysy, jasy, etnosy, bilimi, qonystaný boıynsha reprezentatsııalaıtyn bolady. Bul atalǵan áleýmettik-demografııalyq parametrler boıynsha elektoraldyq kóńil-kúıdi taldaýǵa múmkindik beredi.
