Áleýmettik saýalnama: El joldaryndaǵy problema - sapasyz qurylys pen jóndeý jumystary jáne kólik júrgizý mádenıetiniń tómendigi
ALMATY. 29 sáýir. QazAqparat - Qazaqstan qalalary joldaryndaǵy negizgi problemalardyń basty sebebi - sapasyz qurylys pen jóndeý jumystary jáne kólik júrgizý mádenıetiniń tómendigi. Saıası sheshimder ınstıtýtynyń áleýmettik saýalnamasyna qatysqan el azamattarynyń basym bóligi osyndaı pikir bildirgen.
Respondentterdiń 33,9 paıyzy, ıaǵnı úshten biri óz qalalarynda ahýaldy «joldardaǵy shamadan tys kóliktiń kóptigi ári keptelister» dep baǵalaıdy. Al qalalyqtardyń besten biri júrgizýshilerdiń jol júrý erejesin buzýymen ne bolmasa saqtamaýymen betpe-bet keletindikterin aıtqan. Sonymen qatar saýalnamaǵa qatysqan azamattardyń 14,6 paıyzy joldarda apattyń jıi oryn alatyndyǵyn ataǵan.
Qalalyqtardyń 12 paıyzy «qalanyń kóptegen bóligindegi joldardyń apatty ári nashar jaǵdaıda» ekendigin alǵa tartady. Kólik qoıatyn arnaıy oryndardyń bolmaýy respondentterdiń 8 paıyzyna basty problemaǵa aınalyp otyr. Saýalnamaǵa jaýap bergen turǵyndardyń dál osyndaı paıyzy qala mańyndaǵy eldi mekenderden keletin kólikterdiń joldaǵy qozǵalysqa kedergi keltiretinin aıtýda. Al respondentterdiń 7,5 paıyzy jol polıtsııasy qyzmetkerleriniń jumysyna kóńilderi tolmaıdy.
«Sizdiń pikirińizshe barlyq joldardaǵy problemalardyń negizgi sebebi nede?». Osy saýalǵa jaýap bergenderdiń 36,7 paıyzy joldaǵy jóndeý jumystary men qurylysynyń tıisti deńgeıde júrgizilmegendigin alǵa tartýda. Sonymen qatar 31,8 paıyz respondentter «kólik júrgizý mádenıetiniń tómendigin» ataǵan. Qalalyqtardyń 21,5 paıyzy kóshelerdiń tarlyǵyna, al 17,2 paıyzy qaladan tysqary jerlerden keletin kólikterdiń kóptigine baılanysty joldarda problema týyndap otyr dep sanaıtyndyǵyn bildirgen.
Saýalnama sáýirde elimizdiń 14 oblysy men Astana jáne Almaty qalalarynda júrgizildi. Oǵan 2300 adam qatysty.
