«Áleýmettik salanyń áleýeti arta tústi» - respýblıkalyq basylymdarǵa sholý
ASTANA. Jeltoqsannyń 31-i. / QazAqparat/ - Qazaq aqparat agenttigi respýblıkalyq basylymdarda jeltoqsannyń 31-i, beısenbi kúni shyqqan ózekti materıaldarǵa sholýdy usynady.
***
Keshe Memleket basshysy Nursultan Nazarbaev elordadaǵy Seıfýllın men Sembınov kósheleriniń qıylysqan jerinde ornalasqan Balalar úıinde ótken merekelik sharaǵa qatysty. Osyǵan oraı «Egemen Qazaqstan» basylymynyń búgingi nómirinde «Bala baqyty bal kúlkisinen tanylady» degen taqyryppen maqala jaryq kórdi. «Munda júzderi bal-bul janǵan balalar Prezıdentti «Jańa jyl qutty bolsyn!» degen tilekpen qarsy aldy, jyldaǵy dástúr boıynsha ásem ánder aıtyp, óz ónerlerin ortaǵa saldy. Búldirshinderdiń ónerlerine rıza bolǵan Elbasy olardyń qasyna kelip, árbiriniń basynan sıpap, jańa jylǵa degen ıgi tilekterin jetkizdi», dep jazady basylym.
Memleket basshysynyń elordadaǵy Balalar úıinde bolyp, olardy Jańa jyl merekesimen quttyqtaǵany jaıynda «Astana aqshamy» basylymynan da oqı alasyzdar.
QR Syrtqy ister mınıstrligi keıbir BAQ taratqan Iran Islam Respýblıkasyna ýran jetkizý týraly áldebir kelisimge Qazaqstannyń qatysy bar degen aqparatty úzildi-kesildi joqqa shyǵarady jáne atalmysh aqparatty el abyroıyna kir keltiretin, negizsiz qaýeset dep esepteıdi. Bul týraly QR Syrtqy ister mınıstrliginiń keshe, jeltoqsannyń 30-ynda taratqan málimdemesinde aıtylǵan. «Álemde tórtinshi zymyrandyq-ıadrolyq arsenaldan óz erkimen bas tarta otyryp jáne álemdegi ekinshi iri Semeı synaq alańyn jabý arqyly Qazaqstan dúnıe júzi memleketteri moıyndaǵan álemdik qarýsyzdaný men qarýdy taratpaý protsesiniń kóshbasshylarynyń biri bolyp tabylady», - delingen málimdemede. Málimdeme «Egemen Qazaqstan» gazetiniń búgingi sanynda jaryq kórgen.
«Áleýmettik salanyń áleýeti arta tústi». Osy taqyryppen «Egemen Qazaqstan» basylymynyń jeltoqsannyń 31-inde jaryq kórgen sanynda jarııalanǵan suhbat Eńbek jáne halyqty áleýmettik qorǵaý mınıstri Gúlshara Ábdihalyqovamen órbigen. Ekeýara áńgime barysynda mınıstr «Ótip bara jatqan jyl Qazaqstan úshin eń jemisti jyldardyń biri boldy demesek te, ekonomıkamyzdyń saýyǵýyna bet burǵanyn joqqa shyǵarýǵa bolmas. Daǵdarys salqyny tıgen el ekonomıkasynyń keıbir salalary turaqtylyq synyna tótep berdi. Bul rette áleýmettik salanyń Elbasynyń oń nazarynda bolyp, halyqtyń turmys-tirshiligi tómendemegenin aıta ketý kerek. Der kezinde qabyldanǵan sharalardyń arqasynda kóptegen is atqaryldy» depti.
***
«Aıqyn» basylymynyń jazýynsha, búgin jeltoqsannyń 31-inde álemge áıgili kınorejısser Tımýr Bekmambetovtiń «Qara naızaǵaı» fılminiń tusaýkeser rásimi jasalady. Álemdik deńgeıdegi rejısserdiń has batyr jaıly túsirgen kınomıksiniń bıýdjeti 10 mıllıon dollardy quraıdy. Keshe elordada osy fılmniń jabyq kórsetilimine Úkimet basshysy K.Másimov, Mádenıet jáne aqparat mınıstri M.Qul-Muhammed jáne basqa da laýazymdy ókilder qatysqan.
Osy basylymda jaryq kórgen kelesi maqala «Qazaqqa qaı jańa jyl jaqyn?» degen taqyryppen berilgen. «Qazir búkil Qazaqstan jańa jyldy qarsy alýdyń áýre-sarsańyna túsken sııaqty. Eń qyzyǵy, sońǵy jyldary Jańa jyldan góri Rojdestvoǵa tán atrıbýttar kóshe bezendirý isinen bastap, dúken sórelerinen kórinis taýyp jatqandaı», dep jazady basylym. Jańa jyl jaıyndaǵy basylymnyń paıymyn búgingi sanynan egjeı-tegjeıli oqı alasyzdar.
«Aıqyn» gazetinde Qazaqstannyń halyq ártisi Sara Tynyshtyǵulovamen aradaǵy suhbat «Meniń Qazaqstanym» ánin aıtqanyma týra 50 jyl toldy» degen taqyryppen basylǵan. Ekeýara áńgimeniń tolyq nusqasy basylymnyń búgingi sanynda jaryq kórgen.
***
«Nur Astana» basylymynyń búgingi sanynda álemge tanymal kınorejısser Tımýr Bekmambetovpen aradaǵy suhbat «Qazaq kınosyna qarapaıymdylyq jetispeıdi» degen taqyryppen berilgen.
***
«Astana aqshamy» basylymnyń dástúrli «Áleýmet saýaly - ákim jaýaby» aıdarynda elorda ákimi I.Tasmaǵambetov qala halqynyń ózderin mazalaǵan saýaldaryna tuşymdy jaýap bergen.
«Erteń barys jylynyń tabaldyryqty attap, tórge jaıǵasar jyly. Qazaq halqy úshin barys - óte baǵaly ań. Jalpy shyǵys ǵulamalarynyń kóne jazbalarynda ár jyldy qalaı qarsy alý kerektigi jóninde kóp boljamdar aıtylǵan», dep jazady «Astana aqshamy» gazeti. Barys jylyn qalaı qarsy alý kerek, jyldyń ereksheligi qandaı degen saýaldarǵa atalǵan maqaladan tolyq jaýap ala alasyz.
Barys týraly kólemdi maqalany «Aıqyn» gazetinen de oqýǵa bolady.
«Kazahstanskaıa pravda» basylymynyń QR Prezıdentiniń baspasóz qyzmetine silteme jasap habarlaýynsha, keshe Qazaqstan Respýblıkasynyń Prezıdenti Nursultan Nazarbaev ızraıldik taraptyń bastamasy boıynsha Izraıl Memleketiniń Prezıdenti Shımon Perespen telefon arqyly sóılesken.
Áńgimelesý barysynda ekijaqty yntymaqtastyqtyń damý kelesheginiń máseleleri talqylanyp, óńirlik qaýipsizdik máseleleri boıynsha ózara pikir almasty. Atap aıtqanda, taraptar kelesi jyly AÓІSShK kezekti sammıtin ótkizýdiń mańyzdylyǵyn atap ótti.
Izraıl Prezıdenti Qazaqstan halqyn alda kele jatqan Jańa jylmen quttyqtaı otyryp, Qazaqstannyń 2010 jyly EQYU-ǵa tóraǵalyǵyna tabystar tiledi.
Bul aqparat «Egemen Qazaqstan», «Aıqyn», «Lıter» basylymdarynda da jaryq kórdi.
