Áleýmettik saladaǵy ǵımarattar múmkindigi shekteýli jandarǵa qoljetimdi bolady
Bul týraly búgin «Qazaqstan Respýblıkasynyń Múgedekterdiń quqyqtary týraly BUU konventsııasyn ratıfıkatsııalaýy: oń ózgeristerge umtylys» halyqaralyq konferentsııasy aldynda QR Densaýlyq saqtaý jáne áleýmettik damý mınıstri Tamara Dúısenova málim etti.
«Biz ótken jyldan beri barlyq oblystarda qajetti jumys josparlaryn jasadyq. Oǵan sáıkes, eger jańa úıler salynyp jatqan bolsa, qurylys normalary men erejelerinde múmkindigi shekteýli jandarǵa qolaıly jaǵdaılar mindetti eskeriledi. Al endi buryndary salynǵan ǵımarattardyń barlyǵyna qazir kezeń-kezeńmen bul normalardy engizýdemiz. Bıyldyń ózinde áleýmettik saladaǵy bizge qarasty ǵımarattardyń 70 paıyzyn múmkindigi shekteýli adamdarǵa qoljetimdi etý máselesin qarap jatyrmyz»,-dedi mınıstr.
Sonymen qatar ol bilim jáne ınfraqurylymdyq saladaǵy vedomstvolar da ózderine qarasty ǵımarattardaǵy qolaıly jaǵdaıdy qarastyryp jatqandyǵyn atap ótti.
«Shaǵyn jáne orta bıznes baǵytynda biz jaqynda osy máseleni kóterdik. Bul turǵyda tıisti memorandým bekitilgen»,-dedi mınıstr.
Osy oraıda T. Dúısenova bıznes ókilderin búginde salynyp jatqan nysandardyń mindetti túrde múmkindigi shekteýli jandarǵa qoljetimdi bolýyn eskerýge shaqyrdy. Birinshi kezekte nysandardyń kireberisterine arnaıy pandýstar ornatylýy tıis.
«Kúndelikti jańa ǵımarattar paıdalanýǵa berilip jatyr. Biraq, adamdarǵa eń qajetti nysandarǵa qoljetimdiligin 2020 jylǵa deıin sheshýmiz kerek»,-dedi vedomstvo basshysy.