Áleýmettik sala zańnamalary áleýmettik saıasat qaǵıdattaryna sáıkestendiriledi - Senat

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine eń tómengi áleýmettik standarttar máseleleri boıynsha ózgerister men tolyqtyrýlar engizý týraly» zań jobasyn eki oqylymda qarap, qujatty qabyldady. Qujatqa bir top depýtattar bastamashylyq jasaǵan bolatyn.

«Bul zań jobasy «Eń tómengi áleýmettik standarttar jáne olardyń kepildikteri týraly» zańnyń ilespe qujaty bolyp tabylady. Osy arqyly áleýmettik zańnamalardy júıelendirý kózdeledi. Budan bólek, zań jobasyn qabyldaý, birinshiden, áleýmettik zańnamalardyń normalaryn Memleket basshysy aıqyndaǵan áleýmettik saıasattyń jańa qaǵıdattarymen sáıkestendiredi. Sonyń ishinde, Elbasynyń «Qazaqstan-2050» strategııasynyń mindetteri qamtylady. Ekinshiden, qoldanystaǵy zańnamalarǵa birdeı eń tómengi standarttardy belgilep, biryńǵaı uǵymdar engiziledi. Osylaısha, azamattarǵa kepildendirilgen áleýmettik kómekter berýdegi biryńǵaı quqyqtyq tetik qalyptasady. Úshinshiden, áleýmettik salany retteýde biryńǵaı qadamdar qamtamasyz etiledi», - dedi Májilis depýtaty Svetlana Ferho.

Qujat arqyly 11 zańnamalyq aktilerge, 4 kodekske, 7 zańǵa ózgerister men tolyqtyrýlar engiziledi.

Tutastaı alǵanda, zań azamattardyń memleket tarapynan beriletin áleýmettik quqyqtardy oryndaýdyń biryńǵaı tetigin qurady.

Parlament qabyldaǵan zań Memleket basshysynyń qol qoıýyna joldanady.