Áleýmettik sala mınıstrleri senatorlarǵa jańa zań jobalary týraly baıandady
«Kezdesýde sóz alǵan Premer-Mınıstrdiń orynbasary Berdibek Saparbaev Parlamentke áleýmettik salaǵa qatysty 9 zań jobasy men 4 ilespe qujat túskenin habarlady. Olar Elbasy Nursultan Nazarbaevtyń jáne Qazaqstan Prezıdenti Qasym-Jomart Toqaevtyń tapsyrmalaryn júzege asyrý aıasynda ázirlendi. B.Saparbaev Parlamentke engiziletin zań jobalarynyń sapasyn arttyrý – basty mindet ekenin atap ótti. Senatta depýtattar osy máselege qatysty birneshe márte syn aıtqan bolatyn. Úkimet bul máseleni túsinedi jáne ony sheshýge ázir», - delingen Parlament Senaty baspasóz qyzmetiniń málimetinde.
Aqparat jáne qoǵamdyq damý mınıstri Dáýren Abaev, Bilim jáne ǵylym mınıstri Ashat Aımaǵambetov, Densaýlyq saqtaý mınıstri Eljan Birtanov, Eńbek jáne halyqty áleýmettik qorǵaý mınıstri Birjan Nurymbetov, Mádenıet jáne sport mınıstri Aqtoty Raıymqulova naqty zań jobalary, olardy qabyldaýdan kútiletin nátıjeler, sondaı-aq halyqpen túsindirý jumystary týraly habardar etti.
Senattyń turaqty komıtetteriniń tóraǵalary ár zań jobasy boıynsha eskertýler men usynystar aıtty.
Senat basshysy Darıǵa Nazarbaeva medıa qoǵamdastyqpen birlesip otandyq buqaralyq aqparat quraldaryn qoldaýdyń salalyq baǵdarlamasyn ázirleýdi usyndy.
«Dástúrli medıaǵa degen kózqarasty túbegeıli qaıta qaraý kerek. Bul teledıdar, radıostantsııalar, gazetter, ınternettegi buqaralyq aqparat quraldary. Bul memlekettik saıasat turǵysynan óte mańyzdy ári máseleni jan-jaqty pysyqtaý qajet», - dedi Senat Tóraǵasy.
Darıǵa Nazarbaeva «Jastar jylynyń» qorytyndysy men 2020 jyly «Eriktiler jylyn» ótkizý jospary boıynsha jaýapty mınıstrlikterdiń aqparatyn tyńdaýdy usyndy.
Mınıstrlermen kezdesýdi qorytyndylaı kelip, Bıýro músheleri Senatqa túskenge deıin mańyzdy zań jobalarynyń tujyrymdamasyn talqylaýǵa múmkindik beretin ózara is-qımyldyń osyndaı nátıjeli sıpatyn atap ótti.
Vıtse-premer B.Saparbaev senatorlarǵa birlesken jumysy úshin alǵysyn bildirip, ashyq únqatysýǵa daıyn ekenin jetkizdi.
