Áleýmettik sala mamandarynyń ózgelerden úlgi alýǵa umtylýy jaqsy qasıet - halyqaralyq konferentsııa
aýsymnyń 8-i. QazAqparat /Aıdar Ospanalıev/ - «Áleýmettik sala boıynsha josparlaý jumystaryn meılinshe uzaqqa sozbaǵan jón. Biz múmkindiginshe elimizge kimder kerek, qandaı mamandyqtarǵa zárýmiz jáne olardy qalaı jumyspen qamtımyz degen máselelerdi naqty sheship alýymyz kerek. Al ázirge bul baǵyttaǵy máseleler elimizde naýqanshylyq sıpat alyp otyr»,
degen pikirin bildirdi saıasattanýshy Nurlan Erimbetov búgin Astanada «Álemdik daǵdarys jaǵdaıyndaǵy áleýmettik qamsyzdandyrý: zaman talabyna ulttyq kózqaras» atty taqyrypta ótip jatqan halyqaralyq konferentsııada, dep habarlaıdy QazAqparat.
Onyń paıymdaýynsha, qazir elimizdiń aldynda iri ınnovatsııalyq baǵdarlamalar tur. Biraq áńgime osy baǵdarlamalardy erteń júzege asyratyn mamandar elde bar ma, olardy biz kezinde daıyndaı aldyq pa degen máselege kelip tirelýde. «Al mamandar joq bolǵan soń biz olardy shetelden aldyrtýǵa májbúr bolamyz. Sondyqtan bizge búgin mektepte oqyp jatqan balalardyń ata-analarynyń ózderimen ashyq áńgime júrgizý qajet sııaqty. Óıtkeni elimizdiń árbir turǵyny óziniń ómirin, bolashaqta kim bolatynyn josparlap alýy kerek. Sol arqyly biz tym bolmaǵanda aldaǵy bes jylda ne bolatynyn boljap, soǵan daıyn bolyp otyramyz. Olaı bolmaǵan kúnde biz taǵy naýqanshyldyqqa urynamyz», dedi saıasattanýshy.
Onyń sózine qaraǵanda, búginde elimizde áleýmettik sala boıynsha júrgizilip jatqan jalpy jumystar tıimdiligin kórsetip otyr. «Naqtyraq aıtqanda, áleýmettik saladaǵy sheneýnikter júreksinbesten túrli tájirıbelerdi júzege asyryp, ózgelerden úlgi alýǵa umtylýda. Menińshe bul óte jaqsy qasıet», dedi N.Erimbetov.
