Áleýmettik saqtandyrý qory WhatsApp-ta taraǵan aqparatqa qatysty túsinik berdi
ASTANA. QazAqparat - Memlekettik áleýmettik saqtandyrý qory (MÁSQ) WhatsApp arqyly taraǵan jalǵan aqparatqa senbeýge shaqyrady. Ol aqparattarda MÁSQ-tan 1991 jyldan 2018 jylǵa deıin eńbek etip júrgenderge 560 myń teńgeden beriletini týraly jazylǵan, dep habarlaıdy QazAqparat tilshisi vedomstvonyń baspasóz qyzmetine silteme jasap.
«MÁSQ barlyq azamattardy beıresmı kózderden taraǵan aqparattarǵa senbeýge, áleýmettik jelide taraǵan kúmándi sıpattaǵy barlyq aqparatqa syn kózben qaraýǵa, resmı kózderden taraǵan aqparattarǵa ǵana senýge shaqyrady», - delingen habarlamada.
Vedomstva jalǵan aqparat taratqany úshin zańnamalyq turǵyda jaýapkershilik baryn eske saldy.
«MÁSQ tirkelgen fakt boıynsha protsessýaldyq sheshim qabyldaý úshin quqyq qorǵaý organdaryna júgindi», - dep qosty baspasóz qyzmetinen.
