Áleýmettik nysandarǵa aqshany qysqartqan Úkimet 60 mlrd. teńgeni ıgere almaǵany qalaı? - Q. Sultanov
ASTANA. Maýsymnyń 17-si. QazAqparat /Qanat Mámetqazyuly/ - Áleýmettik nysandarǵa aqshany qysqartqan Úkimet 60 mlrd. teńgeni ıgere almaǵany qalaı? Búgin QR Parlamenti Senatynyń jalpy otyrysynda QR Úkimetiniń jáne Respýblıkalyq bıýdjettiń atqarylýyn baqylaý jónindegi Esep komıtetiniń 2009 jylǵy respýblıkalyq bıýdjettiń atqarylýy týraly esebin talqylaý barysynda senator Qýanysh Sultanov osylaı málim etti.
Úkimet ókilderine qaratyp aıtqan saýalynda senator Qýanysh Sultanov daǵdarystan buryn Memleket basshysy jarııa etken «100 mektep -100 aýrýhana» baǵdarlamasyn tııanaqty oryndaý taǵdyryna alańdaýshylyq bildirdi. «Bul baǵdarlamanyń tolyq oryndalyp jatqanyna baılanysty baıandamalar jer-jerde jarysa aıtylady. Biraq, naqty iske kelgende oǵan tolyq kóz jetpeıdi. Men ózim osy baǵdarlama aıasyndaǵy bir mektepti birshama jyldan beri baqylap otyrmyn. Qytaı shekarasyndaǵy Jarkent qalasynda Y. Altynsarın atyndaǵy mektepke qatysty qurylys byltyr bastalyp, nysandy aıaqtaýǵa jumsalatyn qarajatty bıýdjettik komıssııa kesip tastady. Sonda osy Elbasy baǵdarlamasy aıasyndaǵy áleýmettik qurylysqa aqsha qysqarady da, Úkimet 60 mlrd. qarjyny ıgere almaı qalady. Buny qalaı túsinýge bolady?!», dedi Q. Sultanov.
Sonymen birge, senator bıýdjet týraly zańnyń erejelerine toqtala kele, bul baǵyttaǵy birqatar olqylyqtardy aldyǵa tartty. «Zań qalyptasqanyna jarty jyldan asa ýaqyt ótse de, Úkimet zańnyń oryndalýyn baqylaýdyń ornyna kerisinshe, zańnyń birqatar talaptaryn oryndamaı otyr», dedi.
Depýtat saýalyna jaýap bergen Densaýlyq saqtaý mınıstri Jaqsylyq Dosqalıev Elbasy tapsyrmasyna sáıkes (100 aýrýhana), elimizde 69 densaýlyq saqtaý mekemesi iske qosylǵanyn aıtty. Al qalǵan 31 nysan 2011-2012 jyldary tolyq júzege asatyn bolady.
Al Jarkent qalasyndaǵy mektep qurylysyna qarjynyń toqtatylýy nysannyń qymbattaýyna baılanysty oryn alǵan. «Degenmen, Úkimet atalǵan nysandy tolyq júzege asyrady», dedi Qarjy mınıstri B. Jámishev.
Óz kezeginde senator Q. Sultanov atalmysh mektep taǵdyryna odan saıyn alańdaýshylyq bildirip, bunyń úlken saıasattaǵy, úlken áleýmettik mańyzy zor nysan ekendigin alǵa tarty. «Qytaımen shekarada osydan birneshe jyl buryn salynýǵa tıisti mektepti zańǵa kirgizip alyp, jyl saıyn qaıta-qaıta daý uıymdastyrýdyń qajeti qansha?» dedi depýtat.
