Áleýmettik nysandardyń aldyndaǵy aqyly turaqtardy mindetti túrde jabamyz – Jeńis Qasymbek
ACTANA. QazAqparat – Astana ákimi Jeńis Qasymbek qaladaǵy álemettik nysandardyń aldynan ashylǵan aqyly turaqtardyń bári jabylatynyn aıtty, dep habarlaıdy QazAqparat tilshisi.
Ákimniń kásipkerlermen kezdesýinde Servıstik kompanııalar qaýymdastyǵynyń tóraǵasy Qaırat Kókenov aqyly avtoturaqtarǵa arnalǵan memlekettik-jeke menshik áriptestigi jobasynyń sharttaryn qaıta qaraýdy surady.
Jeńis Qasymbek keleshekte aqyly turaqtardaǵy servıs sapasyna talap kúsheıetinin aıtty.
«Aqyly turaq keńistigi degen álemdik praktıkada qalanyń kólik ınfraqurylymyn sheshýdegi negizgi tásilderdiń biri deýge bolady. Sondyqtan Astanada aqyly turaqtar sózsiz bolady, ásirese, qalanyń ortalyq bólikterinde. Biraq sala ókilderimen birge kelisimsharttardyń birqatar shartyn qaıta qaraý kerek. Birinshiden, turaqqa salynatyn ınvestıtsııa kólemi bar. Ekinshiden, memleket-jeke menshik áriptestigi aıasyndaǵy tabys úlesin qaıta qaraý kerek. Úshinshiden, turaq oryndary boıynsha óte úlken másele bar. Ókinishke qaraı, aqyly turaqtar mektep, aýrýhana sııaqty áleýmettik nysandar janynda qoıylǵan jaıttar bar. Sondyqtan, kásipkerler usynyp otyrǵan usynysty qabyldaımyn. Qazir aqyly turaq usynatyn kompanııa usynys ázirlep jatyr. Aldaǵy aıda osy máseleni tyńǵylyqty talqylaımyz», - degen elorda basshysy kásipkerlerdi osy máselege belsendi qatysýǵa shaqyrdy.
«Biz aqyly turaqtar bolýy kerek ekenin túsinemiz. Kez kelgen zamanaýı qalada ondaı turaqtar bar. Qalaı degenmen de qalanyń ortalyǵynda aqyly turaqtar mindetti túrde bolý kerek. Biraq olar órkenıetti túrde uıymdastyrylýy kerek. Qysta biz aqyly turaqtardyń qary tazalanbaıtynyn kórdik – kóliktiń kirýi múmkin emes. Servıs sapasy joq jáne qala halqy turaq oryndarynyń tapshylyǵyn jıi synaıdy. Qaıtalap aıtaıyn, tipti áleýmettik nysanlaryń mańyna aqyly turaqtar túsip ketken», - dedi Jeńis Qasymbek.
Kezdesýden keıin BAQ ókilderine bergen suhbatynda ákim áleýmettik nysandardyń aldyndaǵy aqyly turaqtardyń bári jabylatynyn aıtty.
«Áleýmettik nysandardyń aldyndaǵy aqyly turaqtar mindetti túrde jabylady», - dedi shahar basshysy.
