Áleýmettik nysandardy tekserýdiń teris saldary basym - K. Burhanov

Toqtala keteıik, komıtet otyrysynda memlekettik organdar tarapynan elimizdegi áleýmettik nysandardyń tekserilýi máseleleri talqylanǵan bolatyn. Osy taqyryp aıasynda júrgizilgen arnaıy zertteýlerdiń qorytyndysy týraly depýtat Kamal Burhanov baıandady. Saýalnama jasyryn negizde júrgizilip, bilim berý, densaýlyq saqtaý jáne mádenıet nysandarynyń basshylary ózderiniń aty-jónderin kórsetýden múldem bas tartqan.

«Saýalnama nátıjesinde birqatar qorytyndy shyǵarýǵa bolady. Birinshiden, áleýmettik obektilerdi tekserý sany shekten shyǵyp otyr. Tekserýge ketetin aqshalaı shyǵyn, onyń ishinde issapar shyǵyndary, jol men jatatyn oryn shyǵynyn esepteý esh múmkin emes. Degenmen, oǵan jumsalatyn bıýdjet qarajatynyń aıtarlyqtaı ekenin ańǵarýǵa bolady. Ekinshiden, tekserý sapasy tym tómen, nemquraılylyq, qarapaıym elementterdiń saqtalmaýy, quzyretsizdik, tipti memlekettik qyzmetshige tán etıkanyń saqtalmaýy da órip júr», - deıdi K. Burhanov.

Budan bólek, depýtat áleýmettik nysandardy tekserýdiń nátıjeliligi de túkke alǵysyz ekenin, tipti tájirıbe kórsetkenindeı, onyń teris saldary basym ekenin alǵa tartty. «Mysaly, zertteýdiń ózi tekserý qaı óńirde az bolsa, sol óńirlerde tártip joǵary ekenin baıqatyp otyr. Sonymen birge, bilim berý, densaýlyq saqtaý nysandarynda oryn alatyn jappaı tekserister osy áleýmettik sala mekemeleriniń negizgi atqaryp otyrǵan qyzmetine ońdyrmaı zalal keltirýde», - deıdi K. Burhanov.

«Tekserýge qunyqqan sheneýnikter toby bilim berý mekemeleriniń negizgi jumyspen aınalysýyna kedergi keltiredi jáne ondaı tekserýler basshylyq pen muǵalimderdiń tikeleı fýnktsııalaryn oryndaýyna jol bermeı, udaıy alańdatyp otyr. Eń quryǵanda sondaı tekserýdiń tıimdiligi bolsa ǵoı. Tájirıbe onyń tıimdiligin de joqqa shyǵarady. Mektepke tekserý kelgende muǵalimder sabaǵyn tastaı turýyna týra keledi, bala oqytý sekildi qasıetti kásip dalada qalyp, nátıjesinde mekteptiń durys jumysy burysqa aınalyp jatyr», - dep túıindeıdi depýtat Kamal Burhanov.