Áleýmettik nysandar endi bıýdjettik josparlaýdyń ońaılatylǵan úlgisi boıynsha salynady
Atalmysh másele «Ashyq saǵat alańy» jobasy aıasynda QR IIDM Qurylys isteri jáne TKSh komıtetinde bıznes qaýymdastyq, qoǵamdastyq, sondaı-aq jergilikti atqarýshy organdar ókilderiniń qatysýymen onlaın formatta kezdesýde talqylandy, dep habarlaıdy QazAqparat QR Indýstrııa jáneınfraqurylymdyq damý mınıstrliginiń baspasóz qyzmetine silteme jasap.
Kezdesý barysynda jıynǵa qatysýshylar Soltústik Qazaqstan jáne Jambyl oblystarynda, sondaı-aq Astana qalasynda áleýmettik nysandar qurylysynyń pılottyq jobalaryn iske asyrý máselelerin talqylaǵan.
Memlekettik sáýlet-qurylys baqylaý basqarmasynyń bas sarapshysy Serik Nábıevtiń aıtýynsha, Memleket basshysy júktegen negizgi tapsyrmalardyń biri bıýdjettik josparlaýdyń jańa ońaılatylǵan modeli boıynsha 3 óńirde 7 áleýmettik mańyzy bar nysan salý bolyp tabylady.
Atap aıtqanda, obektilerdi qarjylandyrý men jobalaýǵa baılanysty kórsetkishter qysqarady.
«Qurylystyń pılottyq jobalaryn iske asyrý maqsatynda jańa normatıvtik quqyqtyq akti qabyldanyp, birqataryna ózgerister engizildi. Qabyldanǵan ınnovatsııalar rásimderdiń merzimi men sanyn 60%-ǵa deıin, al qurylys qunyn 10%-ǵa deıin qysqartýǵa (avtorlyq qadaǵalaýǵa jumsalatyn shyǵyndar alynyp tastaldy) ári merdigerlik jaýapkershilikti arttyrýǵa múmkindik berdi», - dep atap ótti S.Nábıev.
Budan basqa, jańa tetik saraptamalyq súıemeldeý rejıminde qurylys-montajdaý jumystaryn júrgizýge, sondaı-aq balamaly jobalyq sheshimder engizýge múmkindik beredi.
Búgingi tańda Astana qalasynyń, Soltústik Qazaqstan jáne Jambyl oblystarynyń ákimdikteri pılottyq jobalardy iske asyrýdy bastady.
«Atalǵan óńirlerde konkýrstyq rásimder aıaqtaldy, merdigerler anyqtalyp, jobalaý bastaldy»,-delingen QR Indýstrııa jáne ınfraqurylymdyq damý mınıstrliginiń baspasóz qyzmeti taratqan habarlamada.
