Áleýmettik nannyń baǵasy kóterilmeıdi
NUR-SULTAN. QazAqparat – Bıyl 15,1 mln gektar alqap orylyp, 19,1 mln tonna dándi jáne burshaq daqyldary bastyryldy, dep habarlaıdy QazAqparat QR Aýyl sharýashylyǵy mınıstrligine silteme jasap.
Aldyn ala boljamǵa sáıkes, ótken jylǵy azyq-túlik bıdaıynyń aýyspaly qaldyǵy eskerile otyryp, kelesi eginge deıin úlestiriletin kólem 14,9 mln. tonnany qurady. Onyń shamamen 5,9 mln. tonnasy (tuqym, jemshóp, ónerkásiptik óńdeý) ishki tutynýǵa paıdalanylady, eksporttyq áleýeti shamamen 6,0 - 7 mln. tonnany quraıdy.
QR Ulttyq ekonomıka mınıstrliginiń Statıstıka jónindegi komıtetiniń málimetteri boıynsha, 2019 jylǵy 15 qyrkúıektegi jaǵdaı boıynsha astyq qabyldaý kásiporyndarynda 5,1 tonna astyq bar, sonyń ishinde «Azyq-túlik kelisim shart korporatsııasy» AQ-nyń 350 myń tonna astyǵy bar.
Sondaı-aq, Azyq-túlik korporatsııasy 300-350 myń tonnaǵa deıin astyq satyp alady. Óńirlerdegi kásiporyndardaǵy unnyń aılyq qory 178,0 myń tonnany quraıdy. Osylaısha, respýblıkada astyq pen un qory boıynsha jaǵdaı turaqty. Resmı statıstıkaǵa sáıkes, «áleýmettik nan» dep atalatyn birinshi suryptaǵy bıdaı unynan jasalǵan nannyń respýblıkalyq ortasha baǵasy bir bólke úshin 76,5 teńgeni quraıdy. Áleýmettik nannyń baǵasy kóterilmeıdi.
