Áleýmettik nan baǵasyn 90 teńgeden asyrmaý mindetteledi

NUR-SULTAN. QazAqparat – Elimizde óńir ákimdikterimen áleýmettik nan baǵasyn 90 teńgeden asyrmaý jóninde memorandým jasalyp jatyr. Bul týraly QR Aýyl sharýashylyǵy mınıstrligi agrarlyq azyq-túlik naryqtary jáne aýyl sharýashylyǵy ónimin qaıta óńdeý departamentiniń dırektory Nazgúl Hatepova málim etti, dep habarlaıdy QazAqparat tilshisi.

«Ózderińiz biletindeı, nannyń birneshe túri bar. Sonyń ishinde mınıstrlik áleýmettik nan baǵasyn ǵana baqylaı alady. Qazir azyq-túlik korporatsııasynda bar bıdaımen ishki naryqty qamtý sharasy júrip jatyr. Búginde bıdaı tonnasynyń ortasha baǵasy - 150-160 myń teńge, al korporatsııa baǵany túsirip, tonnasyn 90 myń teńgege satyp jatyr. Osylaısha, óńirlerge arzan baǵamen 36 myń tonna bıdaıdy jetkizý jumysy bastalyp ketti. Óńir ákimdikterinen bizge kelip túsken ótinishterge sáıkes, qańtardan qyrkúıekke deıingi arzan bıdaıǵa degen suranys - 275 myń tonna», - dedi Nazgúl Hatepova ortalyq kommýnıkatsııalar qyzmeti alańynda bolǵan baspasóz máslıhatynda.

Aýyl sharýashylyǵy mınıstrligi ókiliniń aıtýynsha, nan baǵasyn belgilengen mejede ustap turý jergilikti atqarýshy organdarǵa júkteledi.

«Óńir ákimdikteri azyq-túlik túlik korporatsııasynan bıdaıdy arzan baǵamen alyp, jergilikti un óndiretin mekemelermen kelisim jasasady. Atalǵan kelisimniń negizinde áleýmettik nannyń baǵasy 90 teńgeden aspaýy tıis. Osy oraıda, qazir oblys ákimdikterimen memorandým jasalyp jatyr, ıaǵnı biz bıdaımen qamtamasyz etsek, jergilikti atqarýshy organdar nan baǵasynyń turaqtylyǵyn qamtamasyz etýge jaýapty bolady», - deıdi ol.

Buǵan deıin mınıstrlik áleýmettik nannyń baǵasyn qymbattatýǵa esh negiz joqtyǵyn aıtqan bolatyn.

Sonymen qatar, álemde bıdaı men unnyń qymbattaýy Qazaqstan naryǵyna áser etpeıtini aıtyldy.

Odan bólek, elimizde bıdaı men un eksportyna shekteý qoıyldy.