Áleýmettik medıtsınalyq saqtandyrýdan túsken 6,6 mlrd teńge qaıda salynady?
ALMATY. QazAqparat - QR Ulttyq bankiniń tutynýshylardyń quqyǵyn qorǵaý jáne syrtqy kommýnıkatsııalar basqarmasynyń basshysy Alekseı Terentev QazAqparat tilshisine áleýmettik medıtsınalyq saqtandyrý qoryna túsken 6,6 mlrd teńge qaıda ınvestıtsııalanatynyn aıtyp berdi.
Mindetti áleýmettik saqtandyrý qory taratqan málimetke sáıkes, shilde-tamyz aralyǵynda qorda 6,6 mlrd teńge jınaqtalǵan.
Onyń ishinde jumys berýshilerdiń salǵan salymy 5,2 mlrd teńgege jetti. Ol barlyq somanyń 78,5%-yn quraıdy.
Al jeke kásipkerlerdiń salymy - 1,4 mlrd teńge boldy. Bul shamamen 21,5 %.
QR Densaýlyq saqtaý mınıstrliginiń habarlaýynsha, jınaqtalǵan qarjy Ulttyq bankte saqtalady.
A.Terentevtiń aıtýynsha, 31 tamyzda Áleýmettik medıtsınalyq saqtandyrý qory men Ulttyq bank senimdi basqarý týraly kelisimge keldi.
Bul kelisimge sáıkes, qor ýaqytsha bos qarjysyn QR Ulttyq banki arqyly belgili bir quraldarǵa sala alady.
Mundaı is-qımyl 2015 jyldyń 16 qarashasynda qabyldanǵan QR «Mindetti áleýmettik medıtsınalyq saqtandyrý týraly» zańnamasyna sáıkes júzege asady.
«QR Ulttyq banki senimdi basqarý kelisimi aıasynda berilgen qor qarjysyn ınvestıtsııalaıdy. Qarjy quraldary QR Úkimetiniń 2016 jylǵy 14 sáýirdegi №210 qaýlysyna saı iriktelip alynady», - dedi Aleksandr Terentev.
Atap aıtqanda medıtsınalyq saqtandyrý qorynyń qarjysy - memlekettik qundy qaǵazdarǵa (QR jergilikti atqarý organdarynyń shyǵarǵan qundy qaǵazdardy, Ulttyq banktiń korrespondenttik qoryndaǵy qarjyny,QR Ulttyq banktegi depozıtterdi qospaǵanda), Standard & Poor's-tegi reıtıngisi A- dárejesinen tómen emes halyqaralyq qarjylyq uıymdardyń oblıgatsııalaryna, reıtıngisi Standard & Poor's boıynsha VV- dárejesinen tómen emes agenttik oblıgatsııalarǵa, keri REPO mámilesine salynady.
Qazaqstandyqtar Ázirbaıjan bankine ketip qalǵan BJZQ qarjysyna áli de alańdaýly.
QR Ulttyq bankinde mundaı nárse qaıtalanbaıtynyn aıtyp sendirdi.
«Memleket qor aktıvteriniń saqtalatynyna kepildik beredi. Túrli normalar men lımıtterdi ornatý arqyly qor jumysyn baqylaý qarjylyq turaqtylyqty qamtamasyz etedi. Investıtsııalyq qyzmetti UB arqyly júzege asyrý, jeke qarjy men qor aktıvterin esebin jeke júrgizý, jyl saıyn táýelsiz aýdıt júrgizý barlyǵy - halyq aqshasynyń saqtalýyn qamtamasyz etedi», - dedi Aleksandr Terentev.
