Áleýmettik medıtsınalyq saqtandyrý jarnalarynyń mólsheri ózgeredi
ASTANA. QazAqparat - Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy QazAqparat.
«Mindetti áleýmettik medıtsınalyq saqtandyrý boıynsha zań jobasymen mólsherlemelerdi jáne aýdarymdar men jarnalardy esepteý nysandaryn ózgertý, sondaı-aq tóleýshilerdiń jańa sanattaryn, olar úshin jarnalardy memleket júzege asyratyn adamdardyń jańa sanattaryn engizý, Áleýmettik medıtsınalyq saqtandyrý qorynyń jumysyn uıymdastyrý jáne mindetti áleýmettik saqtandyrý men tegin medıtsınalyq kómektiń kepildik berilgen kólemi júıesinde dári-dármekpen qamtamasyz etý máseleleri turǵysynda túzetýler qarastyrylyp otyr», - dedi QR Densaýlyq saqtaý mınıstri Eljan Birtanov zań jobasyn tanystyrý barysynda.
Onyń sózine qaraǵanda, eldegi makroekonomıkalyq jaǵdaıǵa baılanysty, sonymen birge jumys berýshilerge túsetin júktemeni tómendetý maqsatynda Ulttyq ekonomıka mınıstrligi jumys berýshilerdiń aýdarymdarynyń deńgeıin tómendetý, jeke kásipker jarnalarynyń mólsherin bekitý usynystaryn engizgen bolatyn.
«Memlekettiń qorǵa tóleýge jatatyn mindetti áleýmettik medıtsınalyq saqtandyrý jarnalary mólsherin 2018 jyldyń 1 qańtarynan 3,75 protsent, 2019 jyldyń 1 qańtarynan 4 protsent deńgeıinde bekitý usynylady. Jumys berýshilerdiń saqtandyrý aýdarymdary 2017 jylǵy 1 shildeden bastap 1 paıyz, al 2018 jylǵy 1 qańtardan 1,5 paıyz bolýy eskerilgen. Ózin-ózi jumyspen qamtyǵan halyqtyń jarnalary eń tómengi eki jalaqydan 5 paıyzdy quraıdy», - dedi mınıstr. Medıtsınalyq kómektiń qoljetimdiligin qamtamasyz etý maqsatynda jarnalardyń memleket tóleıtin adamdar sanatynda 4 jańa sanatty qosý usynylady. Osy oraıda jumys istemeıtin 18 jasqa deıin múgedek balaǵa kútimdi júzege asyratyn azamattar, jumys istemeıtin oralmandar, Qazaqstan aýmaǵynda turaqty turatyn sheteldikter men azamattyǵy joq adamdar, úsh aıdyń ishinde orta tehnıkalyq jáne kásiptik orta bilimnen keıingi joǵary bilim berý, sondaı-aq joǵary bilimnen keıin bilim berý uıymdarynda oqýdy aıaqtaǵan adamdar qamtylyp otyr. Belgili bolǵandaı, aýdarymdar jáne jarnalar tólenbegen jaǵdaıda MEMS júıesindegi medıtsınalyq kómekke azamattardyń quqyǵy boıynsha norma naqtylanady. Budan basqa, ýákiletti organ men Qazaqstan Respýblıkasy Úkimetiniń Qordyń kútilmegen shyǵystardy jabýǵa arnalǵan rezervin qalyptastyrý men paıdalaný jáne olardy bekitý tártibin ázirleý bóligindegi quzyreti tolyqtyrylady. Sonymen qatar áskerı qyzmetshilerge, quqyq qorǵaý organdary men arnaýly memlekettik organdardyń qyzmetkerlerine jáne olardyń otbasy múshelerine medıtsınalyq kómek kórsetý tetigi retke keltirildi.
