Áleýmettik medıtsınalyq saqtandyrý jarnalarynyń deńgeıi aıqyndaldy
Bul týraly QR Parlamenti Senatynyń Áleýmettik-mádenı damý jáne ǵylym komıtetiniń keńeıtilgen otyrysynda QR Densaýlyq saqtaý vıtse-mınıstri Lázzat Aqtaeva málim etti, dep habarlaıdy QazAqparat.
«Mindetti áleýmettik medıtsınalyq saqtandyrý boıynsha zań jobasymen mólsherlemelerdi jáne aýdarymdar men jarnalardy esepteý nysandaryn ózgertý, sondaı-aq tóleýshilerdiń jańa sanattaryn, olar úshin jarnalardy memleket júzege asyratyn jańa adamdardyń sanattaryn engizý, Áleýmettik medıtsınalyq saqtandyrý qorynyń jumysyn uıymdastyrý jáne mindetti áleýmettik saqtandyrý men tegin medıtsınalyq kómektiń kepildik berilgen kólemi júıesinde dári-dármekpen qamtamasyz etý máseleleri turǵysynda túzetýler qarastyrylyp otyr»,-dep toqtaldy Aqtaeva «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.
Onyń sózine qaraǵanda, eldegi makroekonomıkalyq jaǵdaıǵa baılanysty, sonymen birge jumys berýshilerge túsetin júktemeni tómendetý maqsatynda Ulttyq ekonomıka mınıstrligi jumys berýshilerdiń aýdarymdarynyń deńgeıin tómendetý, jeke kásipker jarnalarynyń mólsherin bekitý usynystaryn engizgen bolatyn.
Osy oraıda vıtse-mınıstr memlekettiń Qorǵa tóleýge jatatyn mindetti áleýmettik medıtsınalyq saqtandyrý jarnalarynyń mólsheri 2018 jyldyń 1 qańtarynan 3,75 paıyz deńgeıinde, 2019 jyly 1 qańtardan 4 paıyz mólsherinde usynylatynyn atap ótti.
Sonymen qatar 2022 jyldyń 1 qańtarynan memleket jarnasynyń kólemi jyl saıyn respýblıkalyq bıýdjet týraly zańymen tıisti qarjylyq jylǵa bekitiletin bolady.
Jumys berýshilerdiń saqtandyrý aýdarymdary 2017 jylǵy 1 shildeden bastap - 1 paıyz, al 2018 jylǵy 1 qańtardan - 1,5 paıyz, 2020 jyldyń qańtarynan - 2 paıyz, al 2022 jyldyń qańtarynan 3 paıyz bolýy eskerilgen.
Ózin-ózi jumyspen qamtyǵan halyqtyń jarnalary eń tómengi jalaqydan 5 paıyzdy quraıdy
Onyń aıtýynsha, medıtsınalyq kómektiń qoljetimdiligin qamtamasyz etý maqsatynda jarnalardyń memleket tóleıtin adamdar sanatyn keńeıtý usynylady. Bul rette jumys istemeıtin 18 jasqa deıin múgedek balaǵa kútimdi júzege asyratyn azamattar, jumys istemeıtin oralmandar, Qazaqstan aýmaǵynda turaqty turatyn sheteldikter men azamattyǵy joq adamdar, orta tehnıkalyq jáne kásiptik orta bilimnen keıingi joǵary bilim berý, sondaı-aq joǵary bilimnen keıin bilim berý uıymdarynda oqýdy aıaqtaǵan adamdar qamtylyp otyr.
Sonymen qatar áskerı qyzmetshilerge, quqyq qorǵaý organdary men arnaýly memlekettik organdardyń qyzmetkerlerine jáne olardyń otbasy múshelerine medıtsınalyq kómek kórsetý tetigi retke keltirildi.