Áleýmettik medıtsınalyq saqtandyrý qory qurylady - Senat
ASTANA. QazAqparat - Búgin Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda «Mindetti áleýmettik medıtsınalyq saqtandyrý týraly» zań jobasy qaraldy. Zań jobasy mindetti áleýmettik medıtsınalyq saqtandyrý júıesin engizýdiń birneshe kezeńmen ótýin kózdeıdi.
Qujatpen medıtsınalyq kómekke quqyqtar jáne mindetti áleýmettik medıtsınalyq saqtandyrý júıesinde densaýlyq saqtaý uıymyn tańdaý, mindetti áleýmettik medıtsınalyq saqtandyrý qarajatynyń saqtalýyn qamtamasyz etý aıqyndalady. Sondaı-aq, zań jobasymen mindetti áleýmettik medıtsınalyq saqtandyrý júıesine qatysýshylardyń, aýdarymdar men jarnalardy tóleýshilerdiń, medıtsınalyq kórsetiletin qyzmetterdi tutynýshylardyń, osy júıede medıtsınalyq kómek kórsetý kezinde densaýlyq saqtaý sýbektileriniń quqyqtary men mindetteri rettelmek.
Budan bólek, mindetti tólemderdi shoǵyrlandyrý men medıtsınalyq kórsetiletin qyzmetterdi satyp alý úshin kommertsııalyq emes aktsıonerlik qoǵamnyń uıymdyq-quqyqtyq nysanyndaǵy Áleýmettik medıtsınalyq saqtandyrý qoryn qurý qarastyrylyp otyr. Qordyń quryltaıshysy men jalǵyz aktsıoneri Qazaqstan Respýblıkasynyń Úkimeti bolyp tabylady. Sonymen qatar zań jobasymen Áleýmettik medıtsınalyq saqtandyrý qoryna jarnalar tóleýden halyqtyń áleýmettik turǵydan álsiz toptaryna jatatyn azamattardyń 15 sanaty, onyń ishinde balalar, kópbalaly analar, Uly Otan soǵysyna qatysýshylar men onyń múgedekteri, múgedekter bosatylady.
Qazaqstanda mindetti áleýmettik medıtsınalyq saqtandyrýdy engizý memlekettiń, jumys berýshilerdiń jáne azamattardyń densaýlyq úshin ortaq jaýapkershiligin qamtamasyz etýge, sondaı-aq medıtsınalyq kórsetiletin qyzmetterdiń sapasy men qoljetimdiligin, alǵashqy medıtsınalyq-sanıtarııalyq kómekti, jeke medıtsınany basymdyqpen damytý jáne medıtsınalyq uıymdardyń arasyndaǵy básekelestikti arttyrý esebinen kóterýge jaǵdaı jasaıdy.
Zań jobalary Palatanyń qaraýyna jiberildi.
