Áleýmettik medıtsınalyq saqtandyrý qory arqyly shetelde emdelýge bolady

NUR-SULTAN. QazAqparat – «Qazaqstan halqyna» qorynyń qurylýy Áleýmettik medıtsınalyq saqtandyrý qorynyń jumysy men qarjylyq jaǵdaıyn jeńildetken joq.

Qordyń medıtsınalyq kómek sapasyn monıtorıngteý departamentiniń dırektory Lázzat Shomanova BAQ ókilderiniń saýalyna osylaı jaýap berdi, dep habarlaıdy QazAqparat tilshisi.

«Qazaqstan halqyna» qorynyń qurylýy bizdiń qarjylyq júktememizge áser etken joq. Ol qordyń maqsaty basqa. Bizde naýqastarǵa kórsetiletin kómekke jumsalatyn qarjynyń bári josparlanǵan. Onyń ústine bizde «Shetelde emdeý sharalaryn uıymdastyrý jónindegi jumys organy» deıtin arnaıy organ bar. Sol uıymdastyrýshy organ arqyly bizdiń elde kórsetilýi múmkin emes medıtsnalyq kómekti naýqastardyń shetelde alýyna jaǵdaı jasaımyz. Arnaıy komıssııa bar. Ol komıssııany QR Densaýlyq saqtaý vıtse-mınıstri basqarady. Sol komıssııa maquldasa, emdeýge jiberemiz. ıAǵnı, «Qazaqstan halqyna» qoryna qatysy joq osyndaı kómek túri bar», - dedi ol ortalyq kommýnıkatsııalar qyzmetinde.

Mamannyń aıtýyna qaraǵanda, qordyń sarapshylary shetelge jiberilgen naýqastyń jaǵdaıyn jiti baqylaýda ustaıdy.

«Shetelde emdelýge jibergen kezde 100 paıyz aqysyn aýdara salmaımyz. Basynda 70 paıyzyn aýdarsaq, naýqas elge qaıtar kezde sarapshylar sheteldik áriptesteriniń qorytyndysyn qaraıdy. Sol qorytyndy boıynsha tolyq em júrgizilgenine kóz jetkizip qana sheteldik uıymǵa qalǵan aqshany aýdaramyz.

Bul kómekke syrqatyn bizde emdeýge kelmeıtin, joǵary biliktilikti qajet etetin naýqastar jiberiledi. Kóbinese tinder men aǵazalardyń donoryn qajet etetin naýqastar jiberiledi. Óıtkeni bizdiń mentalıtet marqumdardyń aǵzasyn donorlyqqa berýdi áli durys túsine bermeıdi. Radıatsııalyq emdeý degen bar. Ol boıynsha Belarýs eline jiberemiz, mysaly. Bul kómek ásirese balalarǵa baǵyttalǵanyn aıtý kerek», - dedi Lázzat Shomanova.

Aıta keteıik, 13 sáýirdegi málimet boıynsha, Qazaqstan halqyna qoryna 126 mlrd teńge túsken.