Áleýmettik mańyzy bar taýarlardyń shekti baǵasyn bekitý kerek - senator
Osy oraıda Senattyń jalpy otyrysynda Premer-Mınıstrdiń atyna joldaǵan depýtattyq saýalynda jaǵdaıdy jaqsartýǵa yqpal etetin birqatar qadamdy usyndy.
Depýtat Ulttyq statıstıka bıýrosynyń 2021 jyldyń basynan bastap sábiz 45% - ǵa, kartop 38,5% - ǵa, kúnbaǵys maıy 16,7% - ǵa, pııaz 10,9% - ǵa jáne qant 9,2% - ǵa qymbattaǵany týraly derekterimen bólisti.
Senatordyń aıtýynsha, jalpy ishki ónimniń quramyndaǵy otandyq taýar óndirýshilerdiń úlesi shamamen 30 paıyz, al azyq-túliktiń 70% - y elge ımporttalady, bul baǵanyń ósýine yqpal etpeı qoımaıdy.
«Úkimet baǵany eki tásilmen turaqtandyrýǵa tyrysyp jatyr, biraq aıtarlyqtaı nátıje joq. Birinshisi – 6 paıyzben kásipkerlerge nesıe berý arqyly. Biraq oǵan kóp kásipkerlerdiń jáne sharýa qojalyqtarynyń qoly jetpeı otyr. Ekinshisi – azyq-túlikti tómendetilgen baǵamen satatyn áleýmettik dúkender arqyly. Bul dúkenderdiń sany az, ishki naryqty tolyǵymen qamtamasyz ete almaıdy. Sondyqtan da bul tásilder naryqtaǵy baǵaǵa kóp áserin tıgize almaı otyr. Sondyqtan Úkimet eń aldymen áleýmettik mańyzy bar taýarlarǵa qatysty shekti baǵany bekitip, ókiletti organ baǵanyń ózgerýin qatań túrde baqylaýy tıis»,- dedi depýtat.
Baýyrjan Qanıev, sondaı-aq, Senattyń Ekonomıkalyq saıasat, ınnovatsııalyq damý jáne kásipkerlik komıteti Memleket basshysynyń Joldaýyn iske asyrý aıasynda kóterme saýda ortalyqtary jelisin damytý jáne baǵa belgileýdi jetildirý máseleleri boıynsha ýákiletti memlekettik organdarmen jáne múddeli uıymdarmen kezdesý ótkizgenin atap ótti. Kezdesý qorytyndysy boıynsha arnaıy ázirlengen usynystar Úkimettiń atyna joldandy.
