Áleýmettik mańyzy bar memlekettik qyzmettiń 60 paıyzy elektrondyq nusqaǵa kóshedi
ASTANA. 29 qarasha. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine áleýmettik mańyzdy memlekettik qyzmetterdi ońtaılandyrý jáne avtomattandyrý máseleleri boıynsha ózgertýler men túzetýler engizý týraly» zań jobasyn birinshi oqylymda maquldady.
Zań jobasy Memleket basshysy N.Á. Nazarbaevtyń Qazaqstan halqyna arnaǵan jyl saıynǵy Joldaýynda júktelgen mindetterdi atqarýǵa baǵyttalǵan. Bul rette Elbasy 2012 jyldyń sońyna deıin áleýmettik mańyzdy memlekettik qyzmetterdiń 60 paıyzyn elektrondyq nusqaǵa kóshirý týraly bergen tapsyrmasyn júzege asyrý maqsatynda ázirlendi. Elbasynyń tapsyrmasyn iske asyrý barysynda memlekettik qyzmetterdi usynýdyń bıznes-úderisterin ońtaılandyrý jáne avtomattandyrý boıynsha aýqymdy jumys júrgizildi. Nátıjesinde, memlekettik qyzmetterdi usynýda halyqtan talap etiletin qujattar sany men qyzmet kórsetý ýaqyty qysqartylady.
Senat qaraýyna usynylǵan zań jobasy áleýmettik mańyzdy memlekettik qyzmetterdi elektrondyq nusqaǵa kóshirý úderisin normatıvtik-quqyqtyq turǵyda qamtamasyz etýge baǵyttalǵan. Sonymen birge, qyzmet kórsetý merzimin qysqartý, qyzmetterdi alý úshin talap etiletin qujattardyń tizimi men sanyn azaıtý múmkindikterin jáne memlekettik organdardyń aqparattyq júıeleriniń vedomstvoaralyq árekettesýin bekitý múmkindigin qarastyrady.
Mysaly, jeke kásipkerlikti tirkeý qyzmetin elektrondyq nusqaǵa kóshirgennen keıin, azamattar elektrondyq portal arqyly bir úlgini toltyryp, bir kúnniń ishinde óz kásibin tirkeı alady. Buryn bul qyzmetti alý úshin 5 túrli qujat jınap, onyń nátıjesin 3 kún kútý qajet edi.
Jyljymaıtyn múlikke quqyqty tirkeý qyzmetin jańa nusqaǵa kóshirgen soń, azamattar bul qyzmetti HQKO-na barmaı-aq, jyljymaıtyn múlikti satyp alý týraly shart jasasqan boıda, notarıýstyń kabınetinde otyryp berýge múmkindik beredi.
Aǵymdaǵy jyldyń sońyna deıin Qazaqstan Respýblıkasynyń azamattary tólqujat pen jeke kýálikti alý, azamattardyń keıbir sanatyna áleýmettik kómek taǵaıyndaý týraly ótinishterdi berý jáne ózge de qyzmetter avtomattandyrylatyn bolady.
Birinshi oqylymda maquldanǵan zań jobasy ekinshi oqylymǵa ázirleýge tapsyrylady.
