Áleýmettik mańyzy bar azyq-túlik taýarlaryn óndirý kólemin arttyrý kerek – Asqar Mamın

NUR-SULTAN. QazAqparat – Egis alańdaryn ártaraptandyrý aıasynda áleýmettik mańyzy bar azyq-túlik taýarlaryn óndirý kólemin arttyrýǵa erekshe nazar aýdarý kerek. Bul týral búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Birinshi. Óńirlerdiń ákimderine tizbeler men sýbsıdııalar normalaryn bekitý jumysyn bir apta ishinde aıaqtaýdy tapsyramyn. Bul máseleniń sozylýy fermerlerdiń aldaǵy jumysyna áser etýi múmkin», - dedi Asqar Mamın.

Úkimet basshysy ekinshiden, Energetıka mınıstrligine bekitilgen keste men baǵalar boıynsha egis jumystaryn júrgizý úshin dızel otynynyń qajetti kólemin jetkizýdi qamtamasyz etýdi tapsyrdy.

«Úshinshi. Aýyl sharýashylyǵy mınıstrligi oblystardyń ákimdikterimen birlesip, egis alańdaryna júrgizilip jatqan ártaraptandyrý aıasynda áleýmettik mańyzy bar azyq-túlik taýarlaryn óndirý kólemin arttyrýǵa erekshe nazar aýdarsyn», - degen Premer-Mınıstr bul jumystardy úılestirýdi orynbasary Roman Sklıarǵa júktedi.