Áleýmettik mańyzy bar azyq-túlik satýshylarǵa saýda alańyn jaldaý aqysy tómendetiledi
«Jospardyń ekinshi bóligi boıynsha halyqtyń azyq-túlik taýarlaryn tutyný shyǵystarynyń úlesin tómendetý jáne baǵalardy turaqtandyrý boıynsha 5 jedel jáne 1 orta merzimdi is-sharalardy iske asyrýǵa baǵyttalǵan», - dedi QR Aýyl sharýashylyǵy mınıstri Erbol Qarashókeev Úkimet otyrysynda.
Sondaı-aq, ol salada jańadan 25 myń sharýashylyq qurý josparda bar ekenin málim etti.
«Bul azyq-túlik taýarlarynyń baǵalaryn boljaý, áleýmettik mańyzy bar azyq-túlik taýarlaryn satýshylary úshin saýda naryqtarynyń jaldaý aqysyn tómendetý, baǵalardy ákimshilik retteýden halyqtyń áleýmettik osal toptaryn ataýly qoldaýǵa kóshý boıynsha sharalar ázirleý, turaqtandyrý qorlary qyzmetiniń tıimdiligine baǵalaý júrgizý, aýyldyq jerlerde jumyspen qamtýdy ulǵaıtýdyń jańa nysandary arqyly keminde 25 myń sharýashylyq qurý jolymen aýyl sharýashylyǵy jerleriniń aınalymy, sondaı-aq jańa sýarmaly jerlerdi ıgerý sııaqty is-sharalardy qamtıdy», - dedi mınıstr.
Al úshinshi bólim tutynýshylardy qaýipsiz ónimmen qamtamasyz etý boıynsha 4 jedel jáne 3 orta merzimdi is-sharalardy iske asyrýdy kózdeıdi.
«Zerttelip otyrǵan ımporttyq ónimniń úlesin 80%-ǵa deıin arttyrý úshin tamaq ónimderiniń sapasy men qaýipsizdigin baqylaýdy qamtamasyz etý, 2024 jyly otandyq veterınarııalyq jáne bıopreparattardyń úlesin 80%-ǵa deıin ulǵaıtý úshin qolda bar veterınarııalyq jáne bıopreparattar óndiretin otandyq kásiporyndardy jańǵyrtý jáne jańalaryn qurý sharalary bar», - dedi Erbol Qarashókeev.
