Áleýmettik mańyzy bar azyq-túlik baǵasyn turaqtandyrýǵa jeńildetilgen nesıe beriledi

ASTANA. QazAqparat – Elimizde áleýmettik mańyzy bar azyq-túlik baǵasyn turaqtandyrý tetikteri iske asady. Tolyǵyraq Aýyl sharýashylyǵy mınıstri mindetin atqarýshy Erbol Qarashókeev aıtyp berdi, dep habarlaıdy QazAqparat tilshisi.

«Bıyl jyl basynda turaqtandyrý qorlarynyń jumysy qaıta formattaldy. Osylaısha áleýmettik mańyzy bar azyq-túlik baǵasyn tejeýdiń úsh kezeńdik júıesi engizildi. Bul jerde turaqtandyrý qory arqyly fermerlerge kúzgi jáne erte pisetin kókónisterdi belgilengen baǵamen jetkizýge aldyn ala avans beriledi. Bul maýsymaralyq kezeńde kókónis baǵasynyń ósimin retteýge áser etedi. Qazir óńirler kókónisti ótken jyly jasalǵan kelisimshart negizinde belgilengen baǵamen satyp jatyr. Sonymen qatar, bıyl taýar óndirýshilermen kókónis jetkizýge forvardtyq sharttar jasasý boıynsha jumys júrip jatyr», - dedi Erbol Qarashókeev Úkimet otyrysynda.

Onyń málimetinshe, búginde arzandatylǵan astyqty satý boıynsha memlekettik qoldaý tetigi jeke pysyqtaldy.

«Bul tek un ónimderi boıynsha ǵana emes, sonymen qatar tórt túlik maldy jem-shóppen qamtý arqyly mal sharýashylyǵy ónimderi baǵasynyń ósýin ustap turýǵa múmkindik beredi. Jalpy, áleýmettik mańyzy bar azyq-túlik taýarlary baǵasyn turaqtandyrý tetikteri iske asady. Jańa tásil boıynsha óńir ákimdikteri jergilikti bıýdjetten shamamen 125 mlrd teńge qarastyryp otyr. Onyń ishinde jeńildikpen nesıe berýge 99 mlrd teńge jáne taýar óndirýshilerden tikeleı satyp alýǵa 26 mlrd teńge kózdelgen», - deıdi ol.