Áleýmettik mańyzdy taýarlar úshin 2015 jyldyń 4-toqsanyna shekti baǵalar bekitildi
ASTANA. QazAqparat - Áleýmettik mańyzdy taýarlar úshin 2015 jyldyń 4-toqsanyna shekti baǵalar bekitildi. Bul týraly búgin Premer-Mınıstr Kárim Másimovtiń jetekshiligimen ótken Úkimet otyrysynda QR Ulttyq ekonomıka mınıstri Erbolat Dosaev málim etti.
Mınıstrdiń keltirgen málimetterine qaraǵanda, aǵymdaǵy jyldyń qazan aıynda elimizdegi ınflıatsııa onyń aldyndaǵy aımen salystyrǵanda 5,2 paıyzdy qurasa, bul kórsetkish 2015 jyldyń 10 aıynda 8,2 paıyzdy quraǵan, al 2014 jyldyń qazan aıymen salystyrǵanda 9,4 paıyzdy qurady. Azyq-túlik taýarlaryna baǵalar 2015 jyldyń qazan aıynda 4,6 paıyzdy qurady, (jyl basynan beri 6,1%), azyq-túlik emes taýarlarǵa - 13,9 paıyz, aqyly qyzmetter -5,2 paıyzdy qurady.
«2015 jyldyń 17 qarashadaǵy jaǵdaı boıynsha áleýmettik mańyzdy azyq-túlik taýralarynyń baǵa ındeksi 106,7 paıyzdy qurady. Sonyń ishinde myna taýarlar boıynsha baǵa ósimi biraz joǵary boldy: kúnbaǵys maıy 35,9 paıyz, qant 22,5 paıyz, shaı 16 paıyz, nan 12,5 paıyz, jumyrtqa 11,7 paıyz, un 10,4 paıyz. Jekelegen oblystarda da baǵa kóterilgeni baıqaldy. Máselen, Qostanaı oblysynda taýyq jumyrtqasy 12,5 paıyzǵa, kúnbaǵys maıy 46,3 paıyzǵa ósken. Ósimdik maıy Pavlodar oblysynda 10,6 paıyz, Almaty oblysynda qant 26,5 paıyzǵa ósken», - dedi mınıstr.
Onyń aıtýynsha, «Saýda qyzmetin retteý týraly» Zańǵa sáıkes, Ulttyq ekonomıka mınıstrligi 2015 jyldyń 4-toqsanyna áleýmettik mańyzdy taýarlardyń shekti baǵasyn bekitti.
«Bul árbir oblys, Astana men Almaty qalasy úshin baǵdar bolyp tabylady», - dedi E. Dosaev.
