Áleýmettik mańyzdy azyq-túlik taýarlaryn shektelgen baǵadan joǵary satqany úshin ákimshilik jaýapkershilik belgilenedi - J. Aıtjanova
azannyń 6-sy. QazAqparat /Qanat Mámetqazyuly/ -Áleýmettik mańyzdy azyq-túlik taýarlaryn shektelgen baǵadan joǵary satqany úshin ákimshilik jaýapkershilik belgilenedi. Búgin QR Parlamenti Májilisiniń jalpy otyrysynda «QR keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasy boıynsha baıandaǵan Ekonomıkalyq damý jáne saýda mınıstri Janar Aıtjanova osylaı málim etti.
«Ákimshilik quqyq buzýshylyq kodeksine áleýmettik mańyzy bar azyq-túlik taýarlaryn shektelgen baǵalardan joǵary satqany úshin, sonymen birge taýarlardy iri dúkenderge satý jolynda oryn alyp otyrǵan kemsitýshilik shekteý áreketterine qarsy ákimshilik jaýapkershilik belgilenedi. Atalǵan normany engizýge ishki azyq-túlik naryǵynda otandyq taýarlardyń iri saýda júıelerine túsýine dúkender tarapynan shekteýler qoıý jaǵdaılary sebep boldy. Máselen, taýarlardyń kirisine aqy tóleý sekildi jaǵdaılar otandyq taýar óndirýshilerdiń jumysyna keri áser etedi», - dedi Ekonomıkalyq damý jáne saýda mınıstri Janar Aıtjanova.
Mınıstrdiń aıtýynsha, zań jobasynda «saýda qyzmetin damytýǵa kómek kórsetý» atty jańa taraý qarastyrylady. Bunda jergilikti atqarýshy organdarǵa birqatar is-sharalardy júzege asyrýy júktelip otyr. Atap aıtqanda, jergilikti saýda ınfraqurylymyn damytýǵa baǵyttalǵan ınvestıtsııalyq jobalardy júzege asyrý, jergilikti saýda qyzmetkerlerin kásiptik daıarlaý sharalary óńirdegi bıliktiń moınyna júkteledi. Budan bólek, ákimdikterge otandyq óndirýshilerdiń azyq-túlik taýarlaryn satatyn sýbektilerin ekonomıkalyq yntalandyrý sharalaryn qoldaný, shekara mańyndaǵy saýdany retteý mindetteri qoıylady.
