Áleýmettik mańyzdaǵy azyq-túlik taýarlary qunyn qadaǵalaý qalaı júrgiziledi
«Áleýmettik mańyzy bar azyq-túlik taýarlarynyń (ÁMATT) ózindik qunynyń ósýin tejeıtin quraldardyń biri - baǵa shekterin engizý.
Qazirgi ýaqytta ÁMATT tizimine 19 ónim kiredi: un, nan, jumyrtqa, qaraqumyq, kúrish, qant, kúnbaǵys maıy jáne sary maı, keıbir et túrleri (sıyr, taýyq), sút ónimderi (sút, aıran, súzbe), kókónister (kartop, sábiz, pııaz, qyryqqabat) jáne tuz. Baǵa shegin jergilikti atqarýshy organdar belgileıdi. Ákimdikter ár ónimniń baǵasyn aımaqtaǵy ÁMATT tiziminen esepteıdi jáne bekitedi. Budan ári bekitilgen baǵalardyń dúkenderdegi naqty baǵamen sáıkestigin ákimdikter de baqylaıdy», - delingen Saýda mınıstrligi Tutynýshylardyń quqyqtaryn qorǵaý komıtetiniń málimetinde.
Shekti baǵadan asqan jaǵdaıda saýda sýbektilerine ákimshilik jaýapkershilik qarastyrylǵan. Sonymen, eger osyndaı fakt anyqtalsa, aıyppul 100 AEK, eger qaıtalansa - 200 AEK quraıdy.
Ákimshilik aıyppuldardy jergilikti atqarýshy organdar salady.
Óz kezeginde Saýda mınıstrligi memlekettik organdardy aımaqtardaǵy ÁMATT baǵalaryn belgileý máseleleri boıynsha úılestiredi.
Atap aıtqanda, satýshynyń marjasy óndirýshiniń satý baǵasynan nemese kóterme saýda jetkizýshiniń satyp alý baǵasynan 15% aspaýy kerek.
«Saýda-sattyqtyń maksımaldy ústeme erejelerin, baǵa shekterin buzýshylyqtarǵa jedel jaýap berý nemese áleýmettik mańyzy bar azyq-túlik taýarlarynyń negizsiz qymbattaý jaǵdaılaryn anyqtaý úshin, Saýda jáne ıntegratsııa mınıstrligi Qazaqstan Respýblıkasyndaǵy bólshek saýda obektilerindegi baǵalardy únemi qadaǵalap otyrady. Jedel jáne senimdi aqparat alýdyń mańyzdy arnalarynyń biri - Dosmart.kz keshbek-qyzmeti: árbir qazaqstandyq tamaq ónimderin satyp alǵandyǵy týraly túbirtektiń fotosýretin jibere alady jáne uıaly telefon shotyna 1% deıin keshbek alady. Jınaqtalǵan aqparat mınıstrlikke kelip túsedi, bul bizge baǵany kóterý faktileri týraly tıisti ákimdikke shara qoldaný úshin habarlaýǵa múmkindik beredi», - dep atalyp ótken vedomstvo habarlamasynda.
Tutynýshylar áleýmettik mańyzy bar azyq-túlik taýarlarynyń baǵasy kóterilgen jaǵdaıda, jergilikti atqarýshy organǵa júgine alady.
Baǵany turaqtandyrý jáne baǵanyń kúrt ósýine jol bermeıtin júıelik qadamdardy ázirleý maqsatynda Saýda mınıstrligi múddeli memlekettik organdarmen birlesip Jol kartasyn ázirledi. Qarastyrylǵan is-sharalar qoldanystaǵy mehanızmderdi jetildirýge, óndiristi ulǵaıtýǵa jáne kásiporyndardy qoldaýǵa, zańnamalyq ózgeristerge baǵyttalǵan.
