Áleýmettik mańyzdaǵy avtokólik tasymaldaryn 3 jylǵa QQS-tan bosatý usynyldy
Vıtse-mınıstrdiń aıtýynsha, áleýmettik baǵyttar boıynsha tarıfterdiń tıimsiz bolýyna oraı jáne olardy sýbsıdııalaýǵa qarjylandyrýdyń jetispeýine baılanysty tasymaldaýshylarǵa shyǵyn keledi. Mundaı shyǵyndardy jabý maqsatynda turaqty áleýmettik mańyzy bar avtokólik tasymaldaryn qosylǵan qun salyǵynan 3 jylǵa bosatý usynylady.
«Halyqaralyq tasymaldar úshin Salyq kodeksinde qosylǵan qun salyǵynyń nóldik mólsherlemesi kózdelgen. Alaıda, is júzinde halyqaralyq tasymaldaýdyń bir bóligi bolyp tabylǵanymen, júkti sý kóligine aýystyryp tıeý kezindegi teńiz portyna deıingi temirjol tasymaly halyqaralyq bolyp sanalmaıdy. Teńiz kóligi arqyly tranzıtti damytý úshin jaǵdaı jasaý, tranzıt qunyn tómendetý maqsatynda mundaı tasymaldardy halyqaralyq dep taný ári qosylǵan qun salyǵynyń nóldik mólsherlemesin qoldaný usynylady», - dep túsindirdi M. Tákıev.
Budan bólek, búkil álemde elektrondyq kommertsııa kóleminiń ulǵaıýyna baılanysty poshtalyq tranzıttik áleýetti arttyrý maqsatynda halyqaralyq poshta jóneltimderi boıynsha taǵaıyndalǵan operatordyń qyzmetin qosylǵan qun salyǵyn tóleýden bosatý qarastyrylyp otyr.
Sonymen qatar, zań jobasynda 5G jańa baılanys túrin qurýǵa ınvestıtsııalar tartý maqsatynda radıojıilik spektrin paıdalanǵany úshin tólem mólsherlemesin 5 jylǵa 10 ese tómendetý týraly usynys eskerilgen.
Budan buryn habarlanǵandaı, Parlament Májilisinde «Qazaqstan Respýblıkasynyń keıbir zańnamalyq aktilerine salyq salý jáne ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Qujat aıasynda jeke tulǵalardyń múlki men jerine salynatyn tólemderdi bir salyqqa biriktirý eskerilgen.
Munymen qosa, kólik quraldary salyǵyn tóleý merzimin aýystyrý usynyldy.
