Áleýmettik qyzmetter portalyn qoldaý boıynsha baılanys ortalyǵy iske qosyldy

NUR-SULTAN. QazAqparat - Qazaqstanda Áleýmettik qyzmetter portalyn (budan ári – Portal) qoldaý boıynsha baılanys ortalyǵy jumys isteı bastady. Oǵan tildi tańdap, 4 sanyn basa otyryp, biryńǵaı 1414 nómiri arqyly kirýge bolady, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Ortalyq operatorlary Portal paıdalanýshylary – múgedektigi bar adamdar jáne áleýmettik qyzmetterdi jetkizýshiler úshin aqparattyq-konsýltatsııalyq qyzmetterdi memlekettik jáne orys tilderinde usynady. Atap aıtqanda, Portal jumysy boıynsha keńes alýǵa, tehnıkalyq máseleler boıynsha suranymdy sheshýge, portal fýnktsııalaryn jetildirý boıynsha keri baılanys alýǵa bolady.

Búgingi tańda ortalyqta 3 taldaýshy jáne 5 operator jumys isteıdi, taǵy 3-eýi oqýdan ótýde. Baılanys ortalyǵynyń jumys tártibi: jumys kúnderi saǵat 09:00-den 18:30-ǵa deıin, úzilissiz.

Sondaı-aq, Facebook áleýmettik jelisinde, Telegram messendjerlerinde jáne WhatsApp paıdalanýshylaryna keńes berý úshin chat-botty iske qosý josparlanyp otyr.

Sonymen qatar, avtomattandyrylǵan daýystyq robotty engizý jumystary júrgizilýde. Bul konsýltatsııalar qoljetimdiliginiń joǵary deńgeıin qamtamasyz etýge, jaýap berilmeı qalǵan qońyraýlar sanyn kemitýge jáne suraý sheshilgenge deıin kútý ýaqytyn azaıtýǵa múmkindik beredi.

Esterińizge sala keteıik, Áleýmettik qyzmetter portaly múgedektigi bar adamdarǵa tikeleı jetkizýshilerden ońaltý quraldary men qyzmetterin óz betinshe satyp alý múmkindigin berý úshin 2020 jyly iske qosyldy.

Aǵymdaǵy jyldyń basynan bastap 113 myńnan astam múgedektigi bar adam Portal arqyly ońaltýdyń tehnıkalyq quraldaryn, ymdaý tiliniń 6 myńnan astam qyzmetin, jeke kómekshiniń 31 myńnan astam jáne 36 myńǵa jýyq sanatorlyq-kýrorttyq emdeý qyzmetin aldy. Sondaı-aq 122 myńnan astam adam kepildik berilgen áleýmettik toptamalarǵa tapsyrys jasady.