Áleýmettik qyzmetter portalyn 7 myńnan astam atyraýlyq paıdalanǵan
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, áleýmettik qyzmetter portalyn paıdalanýshylar sany artyp keledi.
«Bıylǵy jyl basynan beri áleýmettik qyzmetter portalyna júgingen múgedektigi bar adamdardyń qatary kóbeıip otyr. Máselen, 1 337 adam ońaltýdyń tehnıkalyq quraldaryn, 170 adam ymdaý tiliniń, 1069 myń jeke kómekshiniń qyzmetin aldy. Bul portal múmkindigi shekteýli jandarǵa ońaltýdyń tehnıkalyq quraldary men qyzmetterin óndirýshini jáne ónim berýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq tsıfrlyq qoltańbasymen rastaý arqyly júzege asyrylady» -dep habarlady Azamat Mámbetov.
Onyń málimetine súıensek, Atyraý oblysynda barlyq sanattaǵy múgedekterdiń sany 24 320 adamdy quraıdy. Onyń ishinde birinshi toptaǵy múgedekter – 2 171, ekinshi toptaǵylar – 9 392, al úshinshi top sanatynda múmkindigi shekteýli 8 664 adam bar. Sonymen qatar, bala jasynan múgedektik tobyna jatatyn 4 093 adam tirkelgen.
Eske sala ketelik, budan buryn 3 myńǵa jýyq atyraýlyq múgedek shıpajaıda tegin emdelgenin habarlaǵan bolatynbyz.
Atyraý oblysy ákimdiginiń qoldaýymen І toptaǵy múgedekter men erekshe balalarǵa, olardyń jeke kómekshilerine 14 kúnge shıpajaıǵa joldama berilgen. Tegin joldamanyń baǵasy 55 aılyq eseptik kórsetkish kólemin quraıdy.
