Áleýmettik qyzmetker: Jalǵyzbasty qarııalar bizdi kórgende balasha qýanady
AQTÓBE. QazAqparat - Qartaıǵanda jalǵyz qalǵan qarııalar bar jaqynynan aıyrylǵan kezde tek áleýmettik qyzmetkerge senedi. Qyrmyzy Balyqova 20 jyl boıy osy salada eńbek etip júr. Áleýmettik qyzmetker QazAqparat tilshisiniń jumysynyń qyr-syryn aıtyp berdi.
Qyrmyzy Balyqova bir ul men bir qyzdyń anasy, bes nemereniń ájesi. Onyń jumysy qarttarǵa medıtsınalyq kómek kórsetip, úı jınaý, dúkennen azyq-túlik tasý, dárihanaǵa barý, kommýnaldyq tólemderdi óteý. Bárine bar bolǵany 2 saǵat ýaqyt berilgen. Osy aralyqta áleýmettik qyzmetker ózi baǵyp-qaǵyp otyrǵan qarııamen sóılesip, áńgimelesip, alystaǵy týysy men balasyna hat jazyp úlgerýi tıis.
«Áleýmettik qyzmetker bolý ózime unaıdy. Biz jalǵyz qalǵan qarttarǵa kómektesemiz, aptasyna eki ret eki saǵatqa baryp, qoldan keler barlyq kómegimizdi beremiz. Olar bizdi, biz olardy kórgende balasha máz bolyp, qushaq jaıyp, qaýyshamyz. Ata-ájeler qyzdaryn kútkendeı tosyp, bizdi esik aldynan qarsy alady. Men 9 adamǵa qyzmet kórsetemin. Olardyń arasynda erli-zaıypty qarııalar bar»,- dedi áleýmettik qyzmetker Qyrmyzy Balyqova.
Aqtóbede áleýmettik qyzmetkerler qoǵamdyq kólikte tegin júredi, olar aıtýly datalarda syıaqy alady. Turǵyn úı sektory arqyly páter kezegine tura alady. Biraq jalaqysy tym az. Qarııalardyń kıimin jýyp, jýyndyryp, shashyp qıyp, kútimin jasaıtyn qyzmetkerler bar bolǵany 47 myń teńge alady.
«Biz qarııalardyń kóńiline qaraımyz. Olardyń qýanyshyn da, qaıǵysyn da bólisip otyramyz. Qarııalar arasynda múlde jalǵyz qalǵany, balalary basqa qalada turatyndary da bar. Biz burynnan jumys istegen soń óz adamyndaı senedi. Árıne, jasy úlkeıgen adam umytshaq keledi. Sol sebepti ereje boıynsha jýrnal júrgiziledi. Sol jýrnalǵa barlyq jumysymyz jazylyp, qoltańba qoıylady. Mundaı jýrnal ekeý. Bireýi áleýmettik qyzmetkerde, ekinshisi qyzmetkerdiń kómegine muqtaj qarııada. Biz alǵashqy medıtsınalyq kómek kórsetemiz. Aldyn ala oqytty, joldaryn bilemiz. Kóbi júrek aýrýyna shaldyqqan, qan qysymy turaqsyz»,- dedi Qyrmyzy Balyqova.
Áleýmettik qyzmetker shydamdy bolýy kerek. Olar qarttarmen áńgimelesip, ómir jolyn tyńdaı alady.
«Basqa jumysqa bara almaımyn. Qarııalarǵa baýyr basyp qaldym, olar bizdiń ata-anamyz sııaqty. Qushaq jaıa qarsy alady, kútip otyrady. Dúısenbi kúni úıden shyǵar kezde telefon shalamyz. Týǵan balalary kele jatqandaı kútedi. Al esigin asha almasaq tótenshe jaǵdaılar qyzmetine habarlasamyz. Polıtsııa qyzmetkeri keledi. Áleýmettik qyzmetker aldymen meńgerýshige habar berýi tıis. Qarııalardyń týǵan-týystarymen de baılanysta bolamyz. Kóbi ózge ult ókili. Sondyqtan jumysta júrip orys tilin úırenýge týra keldi»,- dedi áleýmettik qyzmetker.
Qarııalardan syılyq alýǵa bolmaıdy, áleýmettik qyzmetkerler olarǵa syılyq jasamaıdy. Kez kelgen ýaqytta telefon shalyp, aqyl-keńes suraı alady, al shuǵyl jaǵdaı bolsa, áleýmettik qyzmetker qarııanyń úıine barady. Buryn Uly Otan soǵysynyń ardagerlerine kómek kórsetken Qyrmyzy Balyqova qazir tyl ardagerlerine, zeınetkerler men múgedekterge qaraıdy.
