Áleýmettik qyzmetker bolý úshin úlken júrek kerek – Balǵyn Qasymǵojına
- Balǵyn Qojabaıqyzy, áleýmettik qyzmetkerdiń mindeti aýyr, jumysy kóp. Soǵan qaramastan osy salada úzdiksiz 28 jyl eńbek etip kelesiz. Jalpy mamandyǵyńyz kim?
- Meniń mýzykalyq bilimim bar. 1984 jyly Petropavldaǵy mýzykalyq ýchılışeni «vokal» mamandyǵy boıynsha támamdadym. Án aıtqandy óte jaqsy kóremin. Alaıda, bul salada shamaly ǵana jumys istedim. Qazir Tımırıazev aýdany Dmıtrıev aýyldyq okrýginde áleýmettik qyzmetker bolyp eńbek etip júrmin. Mamandyqty aýystyrǵanyma esh ókingen emespin.
- Jumysyńyz ózińizge unaı ma?
- Árıne, jumysym unaıdy, osy ýaqytqa deıin osy salada turaqtap qalýymnyń birden-bir sebebi osy. Áleýmettik qyzmetker – ol eń birinshi dos, odan keıin kómekshi jáne psıholog. Qandaı jaǵdaıda bolmasyn biz kómektesýge daıyn bolýymyz kerek.
Ol moraldyq nemese quqyqtyq kómek te bolýy múmkin. Meniń qaramaǵymda 5 adam bar. Olardyń ishinde jalǵyzilikti qarttar da, qıyn jaǵdaıdy basynan ótkerip jatqan adamdar da bar. Árqaısysyna mindetti túrde aptasyna eki ret baramyn.
Olar meni asyǵa kútip otyrady. Úı sharýasyna kómektesemin, hal-jaǵdaılaryn bilemin. Keıbirine jaı ǵana áńgimelesý jetispeıdi. Máselen jalǵyzilikti qarııalarǵa aılap emes, jyldap kómekteskendikten týysymyzdaı bolyp ketedi.
Olar óz syrlaryn bólisedi. Kópti kórgen, ómirden kórgen-túıgeni mol ata-ájeler keıde paıdaly keńesterin aıtady.
- Jalpy áleýmettik qyzmetkerdiń mindetine ne kiredi?
- Áleýmettik qyzmetker kóbinese naýqas, jalǵyzilikti, múmkindigi shekteýli jandardyń tamaq ishýine, kıinýine, shashyn alǵyzýyna, qydyrýyna, tipti hat oqýyna jáne jazýyna, taǵy basqa isterine kómektesedi.
Dúkennen qajetti azyq-túlik satyp ákelip beretin de, tamaq daıyndap, otyn, kómir jáne sýyn jetkizip beretin de osy maman. Sondaı-aq múmkindigi shekteýli jandardyń jumysqa ornalasýyna da kómektesedi.
Maǵan keıde túnde habarlasyp, kómek suraıtyn kezderi bolady. Olarǵa kez kelgen ýaqytta qol ushyn berýge daıynmyn. Kópshilik, áleýmettik qyzmetker fızıkalyq jumys isteıdi, aýyldyq jerde turatyndar otyn-sýyn tasıdy, eń qıyny osy dep oılaıdy. Bul - jańsaq pikir.
Eń qıyny qaramaǵyńdaǵy ár adamnyń tilin taba bilý, dostyq qarym-qatynas ornatý. Adamdar, olardyń minezi ártúrli. Qıyn jaǵdaıǵa ushyraǵan, tósekke tańýly bolǵandyqtan kinámshil keledi. Sondaı-aq kúnińdi aldyn ala josparlaı almaısyń.
Mysaly, keshke qaraı kómegim kerek bolyp qalýy múmkin, onda meniń josparymnyń bári keıinge qalyp, týyndaǵan máseleni sheshýim kerek. Bizdiń jumystyń basqalardan ereksheligi de osy shyǵar.
- Áleýmettik qyzmetkerge qandaı talaptar qoıylady?
- Arnaıy talaptary joq. Alaıda kez-kelgen adam áleýmettik qyzmetker bola almaıdy. Ol úshin aldymen úlken júrek kerek. Buryn bul salaǵa medıtsınalyq jáne pedagogıkalyq bilimi bar azamattar alynsa, qazir jaǵdaı basqasha.
Jumysy joq adamdar tartylyp jatyr. Meniń pikirimshe, áleýmettik qyzmetker juǵymdy, kópshil, kúızeliske tózimdi, uqypty, ustamdy, adal, ári ádil bolýy kerek. Sonymen qatar eńbekqor jáne jaýapty bolýy tıis.
Áleýmettik qyzmetker úshin ózgeniń problemasy degen túsinik bolmaýy tıis, qınalǵan adam kórse qolushyn sozyp, kóp oılanyp jatpaı qolynan kelgen kómegin kórsetýi qajet.
- Azamattardyń qaı sanatyna kómek kórsetesizder?
- Áleýmettik qorǵalmaǵan adamdar bizdiń kómegimizge muqtaj. Olar - egde jastaǵy qarttar nemese qater tobyna jatatyn múmkindigi shekteýli jandar, onyń ishinde psıhıkalyq aýrýlary bar adamdar, nashaqorlar, maskúnemder, ıaǵnı, turmys salty buzylyp, odan ózdiginen shyǵa almaıtyndarǵa kómek kórsetiledi.
Máselen, adamnyń psıhıkalyq aýytqýy bar. Ol ózin-ózi qamtamasyz ete almaıdy. Mundaı jaǵdaıda biz onyń arnaıy mekemege ornalasýyna kómektesemiz.
- Merekege oraı áriptesterińizge tilegińiz.
- Meniń áriptesterim - qaıyrymdy, úlken júrekti, basqalardyń qaıǵysyna beıjaı qaramaıtyn adamdar. Olarǵa eń aldymen densaýlyq, tózimdilik, sáttilik jáne otbasynda baqytty bolsa eken degim keledi.
- Áńgimeńizge r ahmet!
