Áleýmettik qyzmetke muqtaj adamdarǵa mamandy tańdaý múmkindigi berilmek

NUR-SULTAN. QazAqparat – Qazaqstanda aldaǵy ýaqytta áleýmettik qyzmetke muqtaj adamdarǵa áleýmettik qyzmetkerdi tańdaý múmkindigi berilmek. Bul týraly Eńbek jáne halyqty áleýmettik qorǵaý mınıstrliginiń QR-da áleýmettik qyzmet kórsetý júıesin odan ári jańǵyrtýdyń 2025 jylǵa deıingi ulttyq josparynyń jobasynda jazylǵan, dep habarlaıdy QazAqparat.

«Áleýmettik qyzmet kórsetýge muqtaj adamdarǵa arnaıy taýarlar men qyzmetterdi tańdaýmen, qyzmet kórsetýdi uıymdastyrýmen qatar, olarǵa qyzmet kórsetetin áleýmettik qyzmetkerlerdi tańdaý múmkindigi usynylatyn bolady. Osy maqsatta áleýmettik qyzmetkerlerdiń biryńǵaı bazasy qurylady. Onda áleýmettik qyzmetkerlerdiń biliktiligi, olar kórsetetin qyzmetterdiń túrleri men sapasy jáne jumys nátıjeleri týraly aqparat qamtylady», - delingen ulttyq jospardyń jobasynda.

Biryńǵaı baza qyzmet tutynýshylaryna básekelestik ortada áleýmettik qyzmetkerlerdi tańdaýǵa múmkindik beredi. Áleýmettik qyzmetkerlerge degen suranys olardyń jalaqy deńgeıinde kórinis tabady. Áleýmettik qyzmetkerlerdiń kásiptik deńgeıin arttyrý úshin úzdiksiz bilim berý elementterin paıdalana otyryp, kadrlar daıarlaýdyń kóp deńgeıli júıesi engiziledi.

Eske sala ketsek Qazaqstanda áleýmettik qyzmet kórsetý júıesi jańǵyrtylatyny ótken aıda habarlanǵan edi. Qazirgi ýaqytta elimizde áleýmettik qyzmetkerler testten ótip jatyr. Osy jyldyń 5 jeltoqsanyna deıin shamamen 12 myń adamdy synaqtan ótkizý josparlanýda. Test áleýmettik qyzmetkerlerdiń bazalyq bilim deńgeıin anyqtaý úshin ótkiziledi. Sodan keıin olar oqytylady.

Qujat jobasy «Ashyq derekter» portalynda ornalasqan.