Áleýmettik qurylystarǵa tıptik jobalaý engizilýi múmkin
ASTANA. 1 qarasha. QazAqparat - Kelesi jyly áleýmettik qurylystardyń tıptik jobalanýy engizilýi múmkin. Búgin Parlament Senatynyń jalpy otyrysynda
«Qazaqstan Respýblıkasynyń Bıýdjet kodeksine ózgerister men tolyqtyrýlar engizý týraly» zań jobasyn talqylaý barysynda Ekonomıkalyq damý jáne saýda mınıstri Erbolat Dosaev osylaı málim etti.
Zań jobasyn talqylaý barysynda senator Qojahmet Baımahanov aýrýhana, mektep, klýb sekildi áleýmettik qurylys jobalarynyń josyqsyz qymbattaýy máselesin kótere kele, ár oblystyń óz betinshe jobalaý jumystarymen aınalysyp jatqanyn synǵa aldy.
«Nege barlyq óńirge ortaq qalyptasqan respýblıkalyq joba joq? Keńes ókimetiniń kezinde 464-oryndyq mektep, 961-oryndyq mektep, 1200-oryndyq mektepter degen, tıptik mektep, tıptik aýrýhanalar boldy. Al nege biz bıýdjet esebinen ártúrli aýrýhana, ártúrli mektep salýǵa tıispiz? Basqasyn bylaı qoıǵanda, nege bizdiń óńirlerde sondaı mektepter men aýrýhana qurylystary negizsiz qymbattap shyǵa keledi?», - dedi Q. Baımahanov.
Óz kezeginde depýtattar saýalyna jaýap bere kele, Ekonomıkalyq damý jáne saýda mınıstri Erbolat Dosaev mundaı máseleniń oryndy kóterilip otyrǵanyn jetkizdi.
«Endigi jyldan bastap biz osyndaı tıptik jobalardy engizemiz be dep oılap otyrmyz. Óıtkeni, sońǵy eki-úsh jyldyń ishinde shynynda da jobalaýda neshetúrli problemalar oryn aldy. Budan bólek, memleket-jeke menshik sektorynyń áriptestiginde osy máselelerdi de qaraýdy oılap otyrmyz. Onyń ústine kelesi jyldan bastap «Qoljetimdi baspana» baǵdarlamasynda da tıptik qurylystar salǵaly otyrmyz», - dedi E. Dosaev.
