Áleýmettik korporatsııalar bıýdjet qarajatyn depozıtke salýdan ǵana tabys tapqan

ASTANA. QazAqparat – Áleýmettik kásipkerlik korporatsııalar bıýdjet qarajatyn bankterge depozıtke salyp qana tabys tapqan. Bul týraly Májilis depýtattarynyń saýalyna QR Sybaılas jemqorlyqqa qarsy is-qımyl agenttiginiń tóraǵasy Oljas Bektenovtiń jaýabynda aıtylǵan.

«ÁKK kópshiliginiń paıdalylyǵy jalǵan (kúmándi) bolyp tabylady. Óıtkeni ol, negizinen, bankterdegi depozıtterge ornalastyrylǵan bıýdjet qarajaty boıynsha paıyzdardyń esebinen, sondaı-aq balansqa berilgen memlekettik múlikti satýdan quralady. Máselen, «Shymkent» ÁKK aktsııalaryn tóleýge kadastrlyq quny 2 mlrd teńge bolatyn 70 jer ýchaskesi (200 gektar) berildi. Onyń ishinde 29 jer ýchaskesi (36,7 ga) keıinnen kásipkerlik sýbektilerine 5,89 mlrd teńgege qaıta satyldy», - dedi agenttik tóraǵasy.

Onyń dereginshe, 2019-2021 jyldary ÁKK «tabysty» dep atalatyn bankterdegi depozıtter boıynsha paıyzdar somasy («Túrkistan», «Ertis», «Almaty», «Baıqońyr», «Tobyl», «Jetisý» jáne «Shymkent») 4,4 mlrd teńgege jetti. Al jalpy paıda 5 mlrd teńgeni qurady.

«Taldaý kórsetkendeı, ÁKK-degi sybaılas jemqorlyq táýekelderiniń negizgi sebebi – olardyń qyzmetiniń zańnamalyq rettelmeýi, óńir basshysynyń tarapynan tıisti baqylaýdyń bolmaýy jáne jeke paıdakúnemdik maqsattarǵa qol jetkizý úshin korporatsııalardyń jekelegen basshylarynyń is júzindegi qasaqana is-áreketteri. Bul rette óndiristik protsester, onyń ishinde operatsııalyq máseleler ÁKK basshylyǵynyń qalaýyna qaraı ózgeretin ishki qujattarmen (qaǵıdalar, nusqaýlyqtar, erejeler, jarǵylar) reglamentteledi», - dedi ol.