Áleýmettik korporatsııalar 800 mln teńgege azyq-túlik jetkizý mindettemesin oryndamaǵan

ASTANA. QazAqparat – Bıyl áleýmettik kásipkerlik korporatsııalary 800 mln teńgege azyq-túlik jetkizý mindettemelerin oryndamaǵan. Bul týraly Májilis depýtattarynyń saýalyna QR Sybaılas jemqorlyqqa qarsy is-qımyl agenttiginiń tóraǵasy Oljas Bektenovtiń jaýabynda aıtylǵan.

«Áleýmettik mańyzy bar azyq-túlik taýarlaryna baǵalardy turaqtandyrýdyń qoldanystaǵy tetikteri tıisti nátıje bermeıdi. Affılırlengen, mamandandyrylmaǵan jáne qarjylyq jaǵynan turaqty emes kompanııalarǵa jeńildikti qaryzdar beriledi. Áleýmettik mańyzy bar azyq-túlik taýarlardyń kelisimshart jasalǵan kólemin jetkizýge baqylaý joq. Qarajat nysanaly maqsatta paıdalanylmaıdy (bankterdegi depozıtterge ornalastyrady, aınalym qarajaty retinde paıdalanady jáne taǵy basqasy)», - dep atap ótedi Oljas Bektenov.

Mysaly onyń dereginshe,«Aqtóbe» ÁKK basshylyǵy 2020 jyly bir ǵana saýda núktesi bar «Brıg» JShS-ǵa 500 mln teńge bólgen. Al onyń Aqtóbe qalasynda da, oblystyń aýdandarynda da saýda jelisi joq.

«Osy jyldyń basynan beri ǵana el boıynsha áleýmettik mańyzy bar azyq-túlik taýarlarynyń baǵasy 11,4 paıyzǵa ósti. Al áleýmettik kásipkerlik korporatsııalardyń azyq-túlik taýarlaryn jetkizý boıynsha oryndalmaǵan mindettemeleriniń somasy 800 mln teńgege jetti», - dedi agenttik basshysy.