Áleýmettik qorǵaýda quqyq buzýshylyq jıi kezdesetin óńirler ataldy

NUR-SULTAN. QazAqparat - Sybaılas jemqorlyqqa qarsy is-qımyl agenttigi eńbek jáne áleýmettik qorǵaý salasynda quqyq buzýshylyq jıi kezdesetin óńirlerdi atady, dep habarlaıdy QazAqparat tilshisi.

«Tek sońǵy eki jylda eńbek jáne áleýmettik qorǵaý salasynda 450-ge jýyq sybaılas jemqorlyq qylmysy tirkeldi. Osy úshin qylmystyq jaýapkershilikke 192 laýazymdy adam tartylýda, 153-i sottaldy. Qylmystyq jaýapqa tartylatyndardyń 70 paıyzdan astamy túrli deńgeıdegi basshylar ekeni úreılendiredi», - dedi Sybaılas jemqorlyqqa qarsy saıasat departamentiniń dırektory Danııar Sabyrbaev Eńbek jáne halyqty áleýmettik qorǵaý mınıstrliginde ótken keńeste.

Onyń sózine qaraǵanda, quqyq buzýshylyqtyń kóbisi Mańǵystaý, Almaty, Pavlodar, Túrkistan, Qaraǵandy oblystarynda anyqtaldy.

Budan buryn habarlanǵandaı, atalǵan keńes barysynda QR Eńbek jáne halyqty áleýmettik qorǵaý mınıstrligi 23 memlekettik qyzmetti avtomattandyrý jáne ońtaılandyrýǵa qatysty sharalar atqaryp jatqandyǵy aıtyldy.