Áleýmettik kómektiń jańa formatyn jetildirý usynystary pysyqtalýda
ASTANA. QazAqparat - Búgin Parlament Májilisindegi Úkimet saǵatynda QR Eńbek jáne halyqty áleýmettik qorǵaý mınıstri Mádına Ábilqasymova ataýly áleýmettik kómektiń jańa formatyn jetildirý boıynsha usynystar pysyqtalyp jatqanyn málim etti, dep habarlaıdy QazAqparat.
«Bıyl jazda biz arnaıy áleýmettik zertteý júrgizdik, onyń maqsaty ataýly áleýmettik kómek alýshylardyń osy kómektiń artyqshylyqtary men kemshilikteri týraly pikirin bilý boldy. Zertteý nátıjeleri kórsetkendeı, ataýly áleýmettik kómekti odan ári jetildirý jumysy eń aldymen onyń mólsherin arttyrýǵa baǵyttalýǵa tıis. Respondentterdiń 84 paıyzy osylaı esepteıdi. Osyǵan baılanysty 2018 jyly iske asyrylǵandy eskere otyryp, Mınıstrlik ataýly áleýmettik kómektiń jańa formatyn odan ári jetildirý boıynsha usynystardy pysyqtaýǵa kóshti», - dep toqtaldy mınıstr.
Osy oraıda ol mınıstrlik ataýly áleýmettik kómekke úmitker azamattardyń jan basyna shaqqandaǵy tabysyn esepteý tártibin jetildirýdi jalǵastyratynyn atap ótti.
«Agroónerkásip ǵylymı-zertteý ınstıtýtymen birge biz jeke qosalqy sharýashylyqtan alynatyn tabys normatıvterin qaıta qaraý boıynsha zertteý júrgizdik. Atalǵan zertteýdiń nátıjeleri qazirgi ýaqytta Aýyl sharýashylyǵy mınıstrligine bekitý úshin jiberildi. Halyqaralyq tájirıbeni eskere otyryp, saralanǵan tásil negizinde muqtajdyqty aıqyndaý boıynsha kedeılik shegi qaıta qaralatyn bolady. Budan basqa, muqtaj adamdardy qoldaý boıynsha jeke jáne keshendi prıntsıpti kúsheıtý úshin áleýmettik qyzmetter men kómek usynýdyń ıntegratsııalanǵan modelin qurý jumysy jalǵasyp keledi. Joǵaryda kórsetilgen jańa tásilderdi iske asyrý muqtaj otbasylardy ataýly áleýmettik kómekpen qamtý kólemin ulǵaıtýǵa, sondaı-aq kedeılikten óz betinshe múmkindik beredi», - dedi Mádına Ábilqasymova.
