Áleýmettik kómektiń 39 túrine memleket tarapynan kepildik berilgen-mınıstr

NUR-SULTAN. QazAqparat - Búgingi tańda qazaqstandyqtarǵa kórsetiletin áleýmettik kómektiń 39 túrine memleket tarapynan kepildik berilip otyr. Bul týraly búgin halyqpen eseptik kezdesý ótkizgen QR Eńbek jáne halyqty áleýmettik qorǵaý mınıstri Berdibek Saparbaev aıtty, dep habarlaıdy QazAqparat tilshisi.

Onyń dereginshe, 2018 jyly 3,8 mln adamǵa bıýdjetten 2,5 trln teńgeden astam zeınetaqy men járdemaqy berildi. Mindetti áleýmettik saqtandyrý júıesiniń tólemderin jalpy somasy 190 mlrd teńge kóleminde shamamen 800 myń adam aldy.

«2019 jyly áleýmettik qamsyzdandyrý men áleýmettik kómekke bólingen qarajat kólemi 674 mlrd teńgege ósip, 3,3 trln teńgeni qurady. Bul respýblıkalyq bıýdjet shyǵystarynyń 28 paıyzyn quraıdy. Áleýmettik tólemderge 2,9 trln teńge kózdeldi» - dep atap ótti Saparbaev

Sonymen qatar, vedomstvo basshysy mınıstrliktiń bolashaqqa josparlaǵan jumystyń jeti basym baǵytyn atap ótti. Birinshi jáne eń mańyzdy mindet Elbasynyń «Áleýmettik qamqorlyq» jańa áleýmettik sharalaryn iske asyrý bolyp tabylady. Múgedektigi bar azamattardy qoldaý júıesin jaqsartýdyń da mańyzy zor. Osyǵan baılanysty Mınıstrlik múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospardy ázirlep, qabyldady.

Kiristerdi ulǵaıtý jáne jumys isteý quqyǵyn júzege asyrý úshin qazaqstandyqtardy nátıjeli jumyspen qamtý jańa ekonomıka úshin kadrlar daıarlaý, qyzmetkerlerdiń eńbek quqyqtaryn qorǵap, laıyqty eńbek jaǵdaılaryn qamtamasyz etý, kóshi-qon protsesterin retteý basym baǵyt bolyp tabylady.

Sondaı-aq, negizgi mindetter qatarynda áleýmettik-eńbek salasyn tsıfrlandyrý belgilengen.