Áleýmettik kómek jalǵasatyny qýantady – Uıǵyr jastary odaǵynyń tóraǵasy
ALMATY. QazAqparat – QR Prezıdenti Qasym-Jomart Toqaevtyń tótenshe jaǵdaı rejımin uzartý týraly sheshimi memleket úshin azamattardyń ómiri men qaýipsizdigi birinshi kezektegi mańyzda ekendigin kórsetti. Osyndaı oıymen Qazaqstan halqy Assambleıasynyń múshesi, Qazaqstan Uıǵyr jastary odaǵynyń tóraǵasy Rýstam Qaıryev bólisti, dep habarlaıdy QazAqparat tilshisi.
«Memleket bul dertpen kúreste qoldan kelgen sharalardy atqaryp jatyr. Biraq, bul jetkiliksiz. Kóp nárse adamdardyń sana-sezimine de tikeleı baılanysty. Prezıdenttiń TJ rejımin 11 mamyrǵa deıin uzartý týraly sheshimi birinshi kezekte azamattardyń densaýlyǵy men qaýipsizdigi týraly alańdaýshylyǵyn bildiredi. Birqatar másele bizdi qýantyp jatyr. Balalarmen alańqaıda oınaýǵa múmkindik jasalmaq, áýe reısteri ashylyp, áleýmettik kómek jalǵasatyn bolady. Munyń barlyǵy kóńilge qýanysh uıalatady», - dedi R.Qaıryev.
«Eger ahýal 11 mamyrǵa deıin turaqtalatyn bolsa, azamattar shydap karantın rejımin saqtaýy kerek. Bul, birinshi kezekte siz ben bizdiń densaýlyǵymyzǵa kerek. Qaýipsizdigimiz ben densaýlyǵymyz qamtamasyz etilse, 11 kún otyra turý – túk emes. Biz aýyryp jatqan dárigerlerdi, kýrsanttardy kórip jatyrmyz. Olar jeke qorǵanys quraldarymen qamtylǵan, aqparattardan habardar. Biraq, sonda da juqtyryp jatyr. Bul, qarapaıym halyq úshin múlde qaýipti dep oılaımyn», - dedi ol.
Spıker jergilikti ákimshilik organdary kórsetip jatqan áleýmettik kómekti tilge tıek etti.
«Biz etnomádenı birlestik retinde ózimiz de áleýmettik qoldaýǵa úlesimizdi qostyq. Sol kezde baqylaǵanym, qaı otbasyǵa kómek alyp barsaq ta, olardyń kópshiligi memleketten de kómek alǵan bolyp shyqty. ıAǵnı, jergilikti atqarý organdary Prezıdent tapsyrmasyn oryndap jatqanyn bildiredi», - dedi Rýstam Kaıryev.
Eske sala ketsek, QR Prezıdenti Qasym-Jomart Toqaev búgin málimdeme jasap, tótenshe jaǵdaı rejımi bıylǵy 11 mamyrǵa deıin uzartylatynyn atap ótti. Sonymen qatar 1 mamyrdan bastap elorda men Almaty qalalary arasynda áýe reısteri ashylatyn bolady.
