Áleýmettik kómek pen áleýmettik masyldyq arasyndaǵy shek asa názik - G. Qaraǵusova
ASTANA. 13 tamyz. QazAqparat - Áleýmettik kómek pen áleýmettik masyldyq arasyndaǵy shek asa názik. Búgin Astanadaǵy Ulttyq muraǵat ǵımaratynda saılaýshylarmen kezdesken Parlament Májilisiniń depýtaty Gúljan Qaraǵusova osylaı málim etti.
«Elbasynyń baǵdarlamalyq maqalasynda - eldiń gúldenýiniń birden-bir kózi eńbek ekenine taǵy bir márte basa nazar aýdaryldy. Jalpy, óz qoǵamynyń ıgiligi úshin jasalatyn kez-kelgen eńbek laıyqty baǵalanýy kerek. Memleket árbir azamattyń óz otbasyn nyǵaıtý arqyly qoǵamnyń damýyna járdem jasaıtyn kez-kelgen qadamdy quptaıtyn bolady. Al búgingi kúni Ispanııa, Italııa, Grekııa men Portýgalııada oryn alyp jatqan jaǵdaıattardy saralasaq, shyn máninde eńbek qoǵamyna barynsha nazar aýdarýdyń qajettigi týyndaıdy. Burynǵy mınıstr retinde meniń baıqaǵanym, áleýmettik kómek pen áleýmettik masyldyq arasyndaǵy shek asa názik. Al biz dál osy shekten asqan sátten bastap ózimizdiń azamattarymyzǵa kómektespeımiz, kerisinshe olardyń áleýmettik masyldyǵyn týdyramyz», - dedi G. Qaraǵusova.
Depýtattyń aıtýynsha, kez-kelgen áleýmettik tólemder basym jaǵdaıda eńbekshilerdiń esebinen tólenedi. Endeshe, jumyssyzdyqqa beriletin járdemaqylardyń qajettigi shamaly. «Qazaqstanda eńbekke qabiletti azamattar 8 mln. adam. Al bizdiń aýqymdy terrıtorııamyzdaǵy júzege asyp jatqan alyp jobalarymyzdy esepke alsaq, onda bizde jumyssyzdar máselesi múldem bolmaýǵa tıis. Sonymen qatar, jyl saıyn bizdiń elimizde 21 myńǵa tarta jumys orny bos qalyp jatady. Bul - adamnyń joqtyǵynan emes, mamannyń joqtyǵynan. Endeshe, qaıta oqýǵa, mamannyń biliktiligin arttyrýǵa barynsha mán berilip otyrýdyń sebebi osynda jatyr. Sonda ǵana memlekettiń áleýmettik salany damytýǵa múmkindigi molynan bolady», - dedi G. Qaraǵusova.
