Áleýmettik kómek alý úshin ajyrasatyndar jıilep ketti -Toqaev
NUR-SULTAN. QazAqparat - QR Prezıdenti Qasym-Jomart Toqaev ataýly áleýmettik kómek alýdaǵy alaıaqtyqtyń aldyn alýdy tapsyrdy, dep habarlaıdy QazAqparat.
Memleket basshysy ataýly áleýmettik kómek alý úshin ajyrasýdyń jıilep ketkenine alańdaıdy.
«Ataýly áleýmettik kómek alý maqsatynda kópbalaly ata-analardyń ajyrasýy jıilep ketti. Úkimet pen Prezıdent Ákimshiligine alaıaqtyqqa tosqaýyl qoıý úshin tsıfrlandyrý júıesin engizýdi jedeldetý tapsyryldy. AÁK - bul muqtaj azamattarǵa beriletin memlekettiń járdemaqysy», - dep jazdy Prezıdent Tvıtter jelisinde.
Buǵan deıin Shymkent qalasynyń Eńbekshi aýdandyq soty qosymsha qarjylaı kómek úshin kópbalaly otbasylardyń jappaı ajyrasyp, ákelerdiń óz mindetterinen bas tartyp jatqandaryn habarlaǵan edi.
