Áleýmettik kodeks qashan qabyldanady
«Mınıstrlik QR Áleýmettik kodeksiniń tujyrymdamasyn ázirleýde. Ol 2022 jyly qabyldanady, al kodekstiń ózin 2023 jyly qabyldaýdy josparlap otyrmyz. Áleýmettik kodekstiń basty jańalyqtarynyń biri áleýmettik qyzmetti jetildirý jáne arnaýly áleýmettik qyzmetter kórsetý jónindegi jeke taraý bolady», - dedi A. Sarbasov TMD-ǵa qatysýshy memleketterdiń Eńbek, jumyspen qamtý jáne halyqty áleýmettik qorǵaý jónindegi konsýltatıvtik keńesiniń otyrysynda.
Onyń aıtýynsha, áleýmettik qyzmet modeli jańǵyrtylady.
«Áleýmettik qyzmetkerlerdi akkredıtteý, attestattaý, jan basyna qarjylandyrýdyń jańa modeli engiziledi, áleýmettik qyzmetkerlerdiń mártebesi artady jáne taǵy basqa sharalar qabyldanady», – dedi Aqmádı Sarbasov.
Aıta keteıik, búgin onlaın rejımde TMD-ǵa qatysýshy memleketterdiń Eńbek, jumyspen qamtý jáne halyqty áleýmettik qorǵaý jónindegi konsýltatıvtik keńesiniń XXXIV otyrysy ótti.
QR Eńbek jáne halyqty áleýmettik qorǵaý mınıstrliginiń basshylyǵy otyrysqa qatysýshylardy áleýmettik-eńbek salasyn jetildirý, áleýmettik ádilettilik pen laıyqty eńbekti qamtamasyz etý boıynsha qabyldanyp jatqan sharalar týraly habardar etti.
