Áleýmettik-kásipkerlik korporatsııalary qyzmetiniń kez kelgen baǵytynda jemqorlyq qaýpi bar - Antıkor

ASTANA. QazAqparat – Áleýmettik-kásipkerlik korporatsııalary qyzmetiniń kez kelgen baǵytynda jemqorlyq táýekeli bar. Bul týraly QR Sybaılas jemqorlyqqa qarsy is-qımyl agenttigi Preventsııa qyzmetiniń basshysy Saıan Ahmetjanov málim etti, dep habarlaıdy QazAqparat tilshisi.

«Áleýmettik-kásipkerlik korporatsııalar qyzmetine syrttaı saraptama tsıkli aıaqtaldy. Jemqorlyq táýekelderi onyń qyzmetiniń árbir baǵytynda anyqtalyp otyr. Birinshi - ınvestıtsııalar jobalardy júzege asyrý jeleýimen jer ýchaskelerin jappaı konkýrstan tys usyný. Mundaı árbir ekinshi jobada kópqabatty turǵyn úıler, meıramhanalar, kólik jýý oryndary jáne basqalary salynǵan. Laýazymdyq qyzmetin asyra paıdalaný faktisimen korporatsııalardyń laýazymdy tulǵalaryna qatysty 9 qylmystyq is tirkelgen. Shyǵyn 1,4 mlrd teńgeni quraıdy. Ekinshi – aktıvterdi tıimsiz paıdalaný. Aktıvterdi affılırlengen tulǵalarǵa tómendetilgen baǵamen satý arqyly memleketke 6 mlrd teńgeden astam somaǵa shyǵyn keltirilgen», - dedi Saıan Ahmetjanov Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, 2019-2021 jyldary ÁKK-lerge azyq-túlik baǵasyn turaqtandyrý úshin bólingen 38,5 mlrd teńge kútken nátıje bermegen. Qarajat negizinen affılırlengen kompanııalarǵa kredıt retinde berilgen jáne baǵany turaqtandyrý mindetiniń oryndalýyna baqylaý bolmaǵan.