Áleýmettik kásipkerlik: Baıanaýyl jastary velotýrızmniń arqasynda aqsha tabýda
PAVLODAR. QazAqparat - Pavlodar oblysyndaǵy aýyl ınternatynyń jas pedagogteri sporttyq týrızm men veloprokat uıymdastyrdy. Osylaısha oqýshylarǵa, zeınetkerlerge aqsha tabýǵa múmkindik jasap, oqý ornynyń materıaldyq bazasyn keńeıtti, dep habarlaıdy QazAqparat tilshisi.
«Atalmysh joba bul salaǵa áleýmettik turǵydan qorǵalmaǵan halyq sanatyna jatatyn zeınetkerlerdi, jalǵyzbasty analardy, oqýshylar men jastardy tartýdy kózdeıtin áleýmettik kásipkerlikti damytýǵa múmkindik berdi. Oǵan Sh. Aımanov atyndaǵy mektep-ınternatynan oqýshylar men zeınetkerler qatysty», - dedi Pavlodar oblysy bilim basqarmasynyń ókili.
Sondaı-aq, atalmysh qozǵalystyń belsendileri ekologııalyq aktsııalar barysynda Sabyndykól men Jasybaı ózenderiniń ortalyq jaǵajaılarynyń, ormandar men bulaqtarynyń, Baıanaýyldyń kıeli jerleriniń mańaılaryn qoqystan tazartty.
Jastar Pavlodar oblysynyń Baıanaýyl aýdanyndaǵy velotýrızmdi damytý boıynsha jumystardy 2017 jyly bastaǵan. Ol kezde Sh. Aımanov atyndaǵy mektep-ınternaty «Samuryq Qazyna» AQ-nyń «Meniń elim» áleýmettik ınvestıtsııalar baǵdarlamasyna qatysyp, áleýmettik jobalar baıqaýynyń jeńimpazy atanǵan. Oqý orny bir mıllıon teńge kóleminde grant jeńip aldy.
«Joba avtorlary bólingen qarajatqa on bes velosıped satyp alyp, Baıanaýyldaǵy ekologııalyq velotýrızm jobasyn bastap ketti. Jobanyń maqsaty: ekologııalyq velotýrızmdi damytý, tabıǵat aıasynda ekologııa, bıologııa, geografııa boıynsha teorııalyq jáne praktıkalyq sabaqtardy, Baıanaýyldyń turǵyndary men qonaqtarynyń bos ýaqyttaryn uıymdastyrý, lastanǵan aımaqtardy velodesanttyń kómegimen qoqystan tazartý, mektep-ınternatynyń bilim alýshylaryna qarjylyq paıda tabý múmkindigin jasaý jáne salaýatty ómir saltyn saqtaý», - dedi bilim basqarmasyndaǵylar.
